Ўзбекистон, Тошкент - Batafsil.uz. АҚШ президенти Дональд Трамп Эрон билан амал қилаётган сулҳни номаълум муддатга узайтиришга қарор қилди. Бу қарор музокараларни давом эттириш учун вақт бериш мақсадида қабул қилингани айтилди.
Яқин Шарқдаги кескин ҳарбий инқироз 7 апрель оқшомида Трамп томонидан Эронга қўйилган ультиматум муддати тугашига икки соатдан кам вақт қолганда, томонлар икки ҳафталик шартли ўт очишни тўхтатиш бўйича келишувга эришгандилар. 21 апрель куни расман бу сулҳ ўз якунига етди.
Кейинчалик Покистон воситачилигида яна сулҳни узайтириш бўйича ташаббус илгари сурилган, бу мамлакат раҳбарияти томонидан қўллаб-қувватланган. Покистон бош вазири Шаҳбоз Шариф ушбу қарорни дипломатик саъй-ҳаракатлар учун муҳим имконият сифатида баҳолаган.
Шу билан бирга, Эрон АҚШ томони қўйган шартларни рад этган. Эрон парламенти раиси ва бош музокарачиси Муҳаммад Боқир Қолибофнинг маслаҳатчиси Президент Трампнинг сулҳни узайтириши кутилмаган зарба бериш учун "вақт сотиб олиш ҳийласи" эканлигини айтган. Қолибофнинг маслаҳатчиси АҚШнинг Эрон портларига қарши блокадасини давом эттиришига нисбатан "бомбардимон қилишдан фарқ қилмайди ва ҳарбий жавоб билан жавоб берилиши керак" деб муносабат билдирган.
Музокаралар жараёни ноаниқлигича қолмоқда. Томонлар ўртасидаги асосий ихтилофлар сақланиб тургани боис, вазиятнинг қандай ривожланиши кейинги дипломатик учрашувларга боғлиқ бўлиб қолмоқда.
Изоҳлар мавжуд емас