Ўзбекистон, Тошкент - Batafsil.uz. АҚШ Халқаро жиноий суд (ХЖС) президенти Томоко Акане ва катта прокурори Абдулай Сеега қарши санкциялар жорий қилди. Бу ҳақда АҚШ Давлат департаменти маълум қилди.
АҚШ давлат котиби Марко Рубионинг айтишича, Акане ва Сее ХЖС юрисдикциясини тан олмайдиган давлатлар мансабдорларини тергов қилиш, ҳибсга олиш ва жиноий таъқиб қилишга қаратилган ҳаракатларда иштирок этган.
Рубио ХЖСни "коррупциялашган ва ўта сиёсийлашган" тузилма деб атаб, суд ўз ваколатларини суиистеъмол қилаётганини таъкидлаган.
ХЖС эса Вашингтоннинг қарорини танқид қилган. Суд вакиллари санкциялар халқаро ҳуқуқ тартиботига таҳдид солиши ва суд ходимларига ўз вазифасини бажаргани учун босим ўтказилишига олиб келишини билдирган.
Санкциялар доирасида Акане ва Сеенинг АҚШга кириши тақиқланади, шунингдек, уларнинг Америка молия тизими орқали молиявий операцияларни амалга ошириши чекланади.
АҚШ ХЖСни таъсис этган Рим статути иштирокчиси эмас. Вашингтон аввал ҳам суднинг бир қатор судьялари ва мансабдорларига нисбатан санкциялар жорий қилган.
АҚШнинг ХЖСга нисбатан эътирозлари, хусусан, суднинг Афғонистонда америкалик ҳарбийлар фаолияти бўйича тергови ҳамда Ғазодаги эҳтимолий ҳарбий жиноятлар юзасидан Исроил раҳбарларига нисбатан ҳибсга олиш ордерлари чиқаргани билан боғлиқ.
Мисол учун, АҚШ президенти Доналд Трамп 6 февраль куни Халқаро жиноий судга Қўшма Штатлар ва унинг яқин иттифоқчиси Исроилга қарши "ноқонуний ва асоссиз ҳаракатлар" учун санкциялар жорий этиш тўғрисидаги фармонни имзолаганди.
Изоҳлар мавжуд емас