Ўзбекистон, Тошкент - Batafsil.uz. Дональд Трамп билан алоқадор Американинг Greenland Energy нефть компанияси Гренландия шарқидаги Жеймсон Ленд ҳудудида қидирув бурғулаш ишларини бошлашга тайёрланмоқда ва йирик нефть захираларини топишга умид қилиб, оролга аллақачон техника олиб борган.
Компания Жеймсон Ленддаги нефть захираларини текшириш учун қудуқлар бурғулашни режалаштирмоқда. Компания раҳбарияти минтақанинг потенциал захираларини триллион долларга баҳоламоқда ва разведкага 60 миллион сармоя киритмоқчи.
Гренландия ҳукумати ускуналарни етказиб беришга рухсат бермаганини маълум қилди. Улар барча кейинги логистика ҳаракатларини амалга оширишдан олдин минерал ресурслар идораси билан келишишни талаб қилишди. Шунга қарамай, июль ойида маҳаллий аҳоли қирғоққа 12 га яқин контейнер туширилган баржани кўриб қолишган. Ҳукумат ускуналар қидирув бурғулашга тайёргарлик кўриш учун етказиб берилганини тасдиқлади. Кемачилик компанияси вакили ҳам унинг Greenland Energy компаниясига тегишли эканлигини тасдиқлади.
Компания Жеймсон Лендда разведка ҳуқуқини тегишли лицензияга эга бўлган Британиянинг 80 Mile компанияси орқали қўлга киритишган. Greenland Energy бурғилаш ишларини олиб бориш учун маҳаллий ҳокимиятдан рухсат олиши керак.
Шу билан бирга, Гренландия экологик хавфлар туфайли 2021 йилда нефть қазиб олиш учун янги лицензиялар беришни тўхтатди. Guardian нашрининг таъкидлашича, режалаштирилган қудуқлар табиатни муҳофаза қилиш зонасида жойлашган бўлиши мумкин.
Greenland Energy акциядорларга ҳукумат билан музокаралар конструктив тарзда кетаётганини ва компания қолган рухсатномаларни олишга умид қилаётганини айтди. Дастлаб иккита қудуқ қазиш режалаштирилган эди, аммо энди компания бир қудуқдан бошлашни режалаштирмоқда.
Лойиҳа Greenland Energy компаниясининг АҚШ президенти Дональд Трамп атрофидагилар билан алоқалари туфайли эътиборни тортди. Хусусан, компания лойиҳа ҳақида ҳужжатли сериал яратиш учун Dr Phil номи билан танилган телебошловчи Phil МcГраwни ёллади. Директорлардан бири Американинг Golden Dome ракетага қарши мудофаа тизими устида ишлаётган АҚШ денгиз флоти фахрийси бўлган.
Greenland Energy нефть лойиҳаси Трампнинг Гренландия устидан назорат ўрнатиш режалари билан боғлиқ эмаслигини айтмоқда. Америка президентининг ўзи орол устидан назоратни қўлга киритиш зарурлиги ҳақида бир неча бор гапирган. Компания 12 сентябрь куни Канададан 300 га яқин бурғулаш ускуналари контейнерларини жўнатишни режалаштирмоқда. Бурғилаш ишлари октябрь ойида бошланиши кутилмоқда.
Аввалроқ АҚШ ва Дания Гренландияда Америка ҳарбий иштирокини кенгайтириш бўйича ёпиқ музокаралар олиб бораётгани хабар қилинганди. Манбаларга кўра, оролнинг жанубий қисмида учта янги ҳарбий объект очиш имконияти муҳокама қилинмоқда.
Изоҳлар мавжуд емас