Ўзбекистон, Тошкент - Batafsil.uz. Эрон ҳукумати икки ҳафтадан буён давом этаётган намойишлар давомида ҳалок бўлган "шаҳидлар" ва хавфсизлик ходимлари хотирасига мамлакатда уч кунлик миллий мотам эълон қилди. Халқаро ташкилотлар эса қурбонлар сони кескин ортиб бораётганидан огоҳлантирмоқда.
2025-йил 28-декабрдан бошланган ва иқтисодий инқироз сабаб келиб чиққан намойишлар Эроннинг 31 вилоятини қамраб олган.
Сўнгги маълумотларга кўра, тўқнашувларда умумий 500-550 нафар намойишчилар ҳалок бўлган. Хавфсизлик ходимлари орасида қурбонлар 109–114 нафарни ташкил этади. Ҳибсга олинганлар 10 681 нафар.
Тасдиқланган қурбонлар орасида камида 9 нафар вояга етмаган бола борлиги қайд этилган.
Энг кўп талафотлар Исфаҳон (30 нафар хавфсизлик ходими ҳалок бўлган), Теҳрон ва Шероз шаҳарларида кузатилган. Расмий статистика берилмаган. Аммо қурбонлар ошиши мумкин.
Мамлакатда интернет алоқасининг тўлиқ узилиши 84 соатдан ортиқ давом этганлиги маълумот олишни қийинлаштирмоқда.
Эрон президенти Масуд Пезешкиан 11-январдан бошлаб 3 кунлик миллий мотам эълон қилди. Бу даврда давлат байроқлари туширилади ва кўнгилочар тадбирлар чекланади. Президент воқеаларни "террорчиларнинг қўпорувчилиги" деб атаган бўлса, АҚШ Президенти Дональд Трамп Эрон ҳукумати "қизил чизиқни" босиб ўтганини ва Вашингтонда қатъий вариантлар мавжудлигини билдирган. Бугун, 12 январь куни Эрон ҳукумати намойишларга жавобан ўз тарафдорларини "Миллий қаршилик марши"га чорлаган.
Бундан олдин 9 январь куни Эрон давлат телевидениеси олий раҳбар Оятуллоҳ Али Хоманаийнинг мамлакат бўйлаб авж олаётган норозилик намойишларига бағишланган фавқулодда нутқини намойиш этганди.
Эслатиб ўтамиз, намойишчилар нафақат кўчаларга чиқишмоқда, балки стратегик нуқталарни эгаллаб, ҳукумат кучларига фаол қаршилик қилмоқда.
Изоҳлар мавжуд емас