Ўзбекистон, Тошкент - Batafsil.uz. Эрон президенти Масъуд Пезешкиён АҚШ билан эришилган келишув доирасида Қатарда музлатилган 6 миллиард долларлик Эрон активлари блокдан чиқарилиб, мамлакатга қайтарилишини маълум қилди.
Унинг сўзларига кўра, Қатарда жами 12 миллиард долларлик Эрон маблағлари сақланмоқда ва Теҳрон қолган активларни ҳам қайтариш бўйича ишларни давом эттирмоқда.
Масъуд Пезешкиён Эрон ва АҚШ ўртасида 18 июнь куни имзоланган тинчлик меморандумини Эрон халқи учун "катта ғалаба" деб атаган. Унинг таъкидлашича, келишув доирасида Эроннинг нефть ва нефть-кимё маҳсулотлари экспортига нисбатан қўлланилган санкциялар бекор қилинган.
Эрон президенти мамлакат ядровий қурол яратишни мақсад қилмаганини, аммо миллий эҳтиёжлар ва расмий сиёсатига мувофиқ ядровий дастурни ривожлантиришда давом этишини билдирган.
Маълум қилинишича, 18 июнь куни имзоланган келишувга мувофиқ, томонлар якуний битимга эришиш мақсадида 60 кун давомида музокаралар олиб боради.
Маълумот учун, АҚШ ва Эрон ўртасида бир неча кун аввал эришилган ўт очишни тўхтатиш келишуви яна жиддий синовга дуч келганди. Ҳўрмуз бўғозида юк кемасига дрон орқали ҳужум қилинганидан кейин Вашингтон Эрон ҳудудидаги ҳарбий объектларга зарба берган. Теҳрон эса бу ҳужумларни халқаро ҳуқуқ ва икки томон ўртасидаги келишувнинг қўпол бузилиши деб атаб, жавоб зарбалари берганини маълум қилган эди.
Изоҳлар мавжуд емас