Ўзбекистон, Тошкент - Batafsil.uz. Дубайдан Тел-Авивга учаётган Flydubai самолётида учувчилар ўртасида жанжал чиққанидан кейин самолётни олиб қочиш сигнали берилган. Йўловчилар жанжал вақтида бақириқлар ва қон изларини кўрганини, учувчилардан бири иккинчисини пичоқлашга уринганини айтган.
Воқеа пайтида учувчилардан бири ҳушини йўқотган. Шундан сўнг экипаж аъзолари ва айрим йўловчилар кабинага кириб, жанжалга аралашган. Улар вазиятни назоратга олгач, самолёт бошқаруви тикланган.
ОАВ маълумотларига кўра, самолётда йўловчи сифатида бўлган бошқа учувчилардан бири бошқарувни ўз қўлига олган ва самолётни Саудия Арабистонидаги Табук аэропортига қўндирган.
Flydubai учувчилар ўртасида жанжал бўлганини тасдиқлаган, аммо уларнинг келиб чиқиши ёки можаронинг аниқ тафсилотларини маълум қилмаган. Исроил ОАВи учувчилар Россия ва Украинадан келиб чиққанини хабар қилган.
Ҳозирда иккинчи учувчи сўроқ қилинмоқда. Исроил махсус хизматлари воқеанинг бир нечта версиясини текширмоқда. Жумладан, учувчилардан бири самолёт бошқарувини эгаллаб, уни йўловчилар билан бирга атайлаб ерга уришга уринган бўлиши мумкинлиги ҳақидаги тахмин ҳам ўрганилмоқда.
Айрим Исроил манбалари воқеа олдиндан режалаштирилган теракт бўлиши мумкинлиги ҳақидаги версия ҳам текширилаётганини билдирган. Бироқ бу маълумотлар ҳозирча расмий тасдиқланган эмас.
Исроилнинг юқори лавозимли амалдорларидан бири воқеа оқибатида катта фожианинг олди олинганини айтган. Унинг талқинига кўра, иккинчи учувчи самолёт бошқарувини эгаллаб, уни йўловчилар билан бирга атайлаб ҳалокатга учириш ниятида бўлган бўлиши мумкин.
Самолётда 180 киши бўлган, уларнинг қарийб 100 нафари исроиллик эди. Воқеа вақтида Исроил ҳарбий-ҳаво кучлари қирувчи самолётларни ҳавога кўтарган.
Изоҳлар мавжуд емас