Ўзбекистон, Тошкент - Batafsil.uz. Марокаш қироли Муҳаммад VI Ҳақиқийлик ва замонавийлик партияси миллий координатори ҳамда Марракеш шаҳри мэри Фатима Эззаҳра ал-Мансурийни мамлакатнинг янги Бош вазири этиб тайинлади. Қироллик саройи томонидан эълон қилинган қарорга кўра, 50 ёшли сиёсатчига янги ҳукуматни шакллантириш вазифаси юклатилди.
Ушбу тайинлов Марокаш тарихида аёл кишининг ҳукумат раҳбари бўлиши билан боғлиқ илк воқеликдир, шунингдек, Тунис собиқ Бош вазири Нажла Будендан сўнг араб дунёсида ушбу лавозимни эгаллаган иккинчи аёл сифатида қайд этилган.
Эззаҳра ал-Мансурий раҳбарлигидаги партия парламент сайловларида 395 та ўриндан 97 тасини қўлга киритиб, 1-ўринни эгаллаган ва эндиликда янги бошқарув коалициясини тузиши лозим бўлади.
Янги ҳукумат раҳбари олдида Марокаш, Португалия ва Испанияда ўтказилиши режалаштирилган 2030 йилги Футбол бўйича жаҳон чемпионати олдидан миллиард долларлик инвестицияларни тақсимлаш каби муҳим вазифалар туриши айтилган.
Маълумот учун, Фатима Эззаҳра ал-Мансурий 1976 йилда туғилган бўлиб, ҳуқуқшунослик бўйича Франция ва АҚШ олий таълим муассасаларида таҳсил олган. У 2009 йилда Марракеш шаҳрининг биринчи аёл мэри сифатида маҳаллий бошқарувга кириб келган, кейинчалик парламент депутати ҳамда Шаҳарсозлик ва уй-жой сиёсати вазири лавозимларида фаолият юритган.
Ўтган йили ҳам Японияда тарихда ҳам биринчи марта аёл киши бош вазир бўлганди. Ҳукмрон Либерал-демократик партия (ЛДП) етакчиси этиб консерватив қарашларга эга сиёсатчи Санаэ Такаити сайланган эди, у партия ичидаги сайловларнинг иккинчи босқичида ғалаба қозонган.
Изоҳлар мавжуд емас