Франциядаги тартибсизликлар оқибатида етказилган зарар 1 миллиард евродан ошиши мумкин

Ўзбекистон, Тошкент - Batafsil.uz.   Францияда бўлиб ўтган оммавий тартибсизликлар оқибатида вайрон қилинган ва туналган дўкон ҳамда бизнес объектлари сони камида 3 000 тага етди. Зарар кўрган бизнес субъектлари сони 2023 йилги кўрсаткичлардан (2 500 та бизнес ва 793 миллион евро суғурта товони) сезиларли даражада ошиб кетгани сабабли, умумий етказилган молиявий зарар 1 миллиард евродан ортиши кутилмоқда.

Суғурта компаниялари ва Франция Суғуртачилар федерацияси (France Assureurs) зарар кўрган мижозларнинг мурожаатларини қабул қилиш ва аризаларни қайта ишлаш учун тўлиқ сафарбар этилган. Юз берган вайронгарчиликлар мамлакат молия ва фонд бозорларига ҳам жиддий путур етказган.

Эслатиб ўтамиз, аввалроқ Президент Эммануэль Макрон 18 октябрь куни халққа мурожаат қилиб, зўравонликни қоралаганди ва норозилик иштирокчиларининг қонуний талабларини уларнинг жамоат тартибини бузган ҳаракатларидан ажратиш кераклигини таъкидлаганди.

Франциянинг асосий CAC 40 индекси 1,1 фоизга тушиб кетган. Дўконлари талаб кетилган Carrefour тармоғининг акциялари 2,2 фоизга, Марселдаги бутиги босиб олинган LVMH ҳашаматли бренди акциялари эса 1,8 фоизга арзонлашган. Шунингдек, AXA (1,3%) ва SCOR (0,9%) каби йирик суғурта компанияларининг акцияларида ҳам пасайиш кузатилган.

Франция ва Германиянинг 10 йиллик облигациялари ўртасидаги даромадлилик фарқи 148 базис пунктигача кенгайган.

Франция 2026 йилги бюджет қонунида тартибсизликлардан кўриладиган зарарларни қоплаш учун янги суғурта тизимини ва 4 миллиард евролик давлат кафолатига эга миллий жамғармани назарда тутган.

Бироқ ушбу тизим Еврокомиссия тасдиғидан ва ҳукумат қароридан ўтиб улгармагани сабабли, жабрланган тадбиркорлар ҳозирча фақат мавжуд шахсий суғурта шартномаларига таянишга мажбур.

Бош вазир Себастьян Лекорню тартибсизликлардан жабр кўрган корхоналар ўз ходимларини давлат томонидан молиялаштириладиган "вақтинчалик ишсизлик" (activité partielle) дастурига ўтказишлари мумкинлигини маълум қилган. Ҳозиргача 2 400 дан ортиқ киши ҳибсга олинган, президент Эммануэль Макрон эса Ички ишлар вазири Лоран Нуньеснинг истеъфосини рад этган.

Ҳукуматнинг ушбу кутилмаган харажатлари ва компенсация тўловлари бюджет дефицити ялпи ички маҳсулотнинг 5,4 фоизига, давлат қарзи эса ялпи ички маҳсулотнинг 119 фоизига етган бир пайтда француз иқтисодиёти учун оғир синов бўлмоқда.