Ўзбекистон, Тошкент - Batafsil.uz. Илон Маск бошқарадиган SpaceX ва Tesla компаниялари бирлашиш имкониятини кўриб чиқмоқда. Икки компаниянинг мустақил директорларидан тузилган махсус қўмиталари эҳтимолий битим шартларини ўрганмоқда, бироқ Маск келишув ҳали кафолатланмаганини таъкидлади. Бу хабар SpaceX 2026 йилнинг учинчи чорагида 14,6 млрд доллар тушум ва 4,4 млрд доллар соф фойда қайд этгани маълум бўлганидан кейин эълон қилинди.
Мазкур юксалишда сунъий интеллект хизматлари, булутли ҳисоблаш инфратузилмаси ҳамда Starlink сунъий йўлдош интернет тармоғи асосий омил бўлган.
Молиявий ҳисобот 20 октябрь куни эълон қилинган бўлиб, ўша куни сармоядорлар билан ўтган мулоқотда Маск SpaceX ва Tesla бирлашиши эҳтимоли кўриб чиқилаётганини тасдиқлаган.
Бироқ у бундай битимнинг амалга ошиши муқаррар эмаслигини, ҳар икки компаниянинг мустақил директорларидан иборат махсус қўмиталар ҳали келишув шартлари бўйича бир қарорга келмаганини алоҳида таъкидлаган.
SpaceX ҳисоботига кўра, 2026 йилнинг учинчи чорагида компаниянинг жами даромади 14,575 миллиард долларни ташкил этиб, 2025 йилнинг мос давридаги 5,576 миллиард доллардан 161 фоизга ошган.
Энг катта улуш сунъий интеллект ва ҳисоблаш инфратузилмасини ўз ичига олган Super Intelligence тармоғидан келиб тушган ва у 7,56 миллиард долларни ташкил этган.
Бунга янги булутли шартномалар, Cursor дастурлаш воситасининг сотиб олиниши ҳамда Grok моделидан фойдаланиш кескин ошгани сабаб бўлган. Натижада компания булутли ҳисоблаш инфратузилмаси қувватини 1,7 гигаваттга етказган.
Шу билан бирга, Маск SpaceX ва Tesla компаниялари ўртасидаги эҳтимолий бирлашув масаласига тўхталиб, икки компаниянинг мустақил қўмиталари битим истиқболларини ўрганаётганини ва ўзи манфаатлар тўқнашувига йўл қўймаслик учун бу муҳокамаларда иштирок этмаётганини маълум қилган.
Унинг фикрича, икки гигантнинг интеграциялашуви сунъий интеллект, микрочиплар ишлаб чиқариш, робототехника ва космик тизимларни ривожлантиришни кескин тезлаштириши мумкин, бироқ келишув ҳали кафолатланмаган ва қарор қабул қилиш учун акциядорларнинг розилиги талаб этилади.
Эслатиб ўтамиз, аввалроқ Tesla компанияси 9 йиллик кечикишдан сўнг иккинчи авлод Roadster электр спорт автомобилини намойиш этганди.
Изоҳлар мавжуд емас