Ўзбекистон, Тошкент - Batafsil.uz. Россия иқтисодий ривожланиш вазири Максим Решетников меҳнат мигрантларини "келди, ишлади, кетди" моделига ўтказишни таклиф қилди. Унинг қайд этишича, мамлакатга чет эллик ишчиларнинг оилалари керак эмас, давлат эса уларни ўқитишга мажбур эмас.
Вазирнинг таъкидлашича, келажакда Россия мигрантларнинг фарзандларини ўқитиш ва уларнинг оилаларини таъминлаш билан узоқ муддатли миграцияга умид қилмаслиги керак.
Шунга қарамай, Решетников меҳнат танқислиги шароитида мигрантларни жалб қилишга тўғри келишини тан олмоқда. Бироқ миграцияга "келди, ишлади, кетди" тамойили асосида ёндашиш лозим.
"Ҳаммаси адолатли, бошқа давлатлардан келиб, ишлаб, пул олиб кетишади. Бизга бу ерда оиланинг ҳам кераги йўқ, [мактабларда] ҳеч кимни ўқитишга мажбур ҳам эмасмиз. Шунинг учун бу жараён йўлга қўйилмоқда, аммо миграцияга, ўйлайманки, ҳеч ким узоқ муддатга жиддий таянишга тайёр эмас", - деди вазир.
Унинг сўзларига кўра, ҳозирги асосий вазифа - меҳнат унумдорлигини янада ошириш. Бунинг учун алоҳида лойиҳа ишлаб чиқилган. Бундан ташқари, платформа иқтисодиёти унинг ривожланиши учун катта имкониятлар яратади.
Эслатиб ўтамизки, Россияда мигрантлар учун мамлакатда бўлиш қоидалари доимий равишда кучайтирилмоқда. Хусусан, 1 сентябрдан бошлаб Ўзбекистон ва бошқа бир қатор мамлакатлардан ташриф буюрган меҳнат мигрантлари учун миграция хизматлари учун давлат божлари оширилди, бир қатор ҳудудларда бандлик соҳалари чекланди. Бундан ташқари, Москва ва Москва вилоятига борган мигрантлар ўзларининг қаердалигини назорат қилиш учун мобил иловани ўрнатишлари шарт.
Изоҳлар мавжуд емас