Ўзбекистон, Тошкент - Batafsil.uz. Непал ва Хитойнинг Тибет ҳудуди чегарасида 26 август куни юз берган кучли сел ва ер кўчиши оқибатида ҳалок бўлганлар сони 390 нафардан ошди. Ҳудудда 1,4 мингдан ортиқ киши бедарак йўқолгани хабар қилинмоқда.
Фожиа Непалнинг Расува туманида, Хитойнинг Тибет автоном райони билан чегара яқинида содир бўлган. Кучли оқимга музлик ва тоғ жинсларининг қулаши сабаб бўлгани тахмин қилинмоқда. Ер кўчиши натижасида Лхенде дарёсига улкан миқдорда муз, тош, лой ва сув тушиб, кейинчалик сел оқими Бхоте-Коши ва Тришули дарёлари бўйлаб пастга қараб тарқалганди.
Табиий офат оқибатида Расувагодхи чегара ўтиш пункти ҳам жиддий зарар кўрган. Ҳудуддаги кўплаб йўллар ва кўприклар вайрон бўлган, инфратузилма объектлари сел остида қолган. Тришули дарёси сатҳи қисқа вақт ичида қарийб 9 метрга кўтарилган.
Спутник тасвирлари фожианинг кўламини кўрсатган. Тадқиқотчиларнинг маълум қилишича, тоғ ёнбағридаги улкан муз ва тоғ жинслари массасининг қулаши водийга қараб ҳаракатланган ва йўлидаги дарёларни тўсиб, кейин кучли сел оқими ҳосил қилган.
Ҳозир қутқарув ишларига яна бир хавф таҳдид солмоқда. Кўчки дарёни тўсиб қўйиши натижасида катта сув ҳавзаси пайдо бўлган. Унда тахминан 2,5 миллион куб метр сув тўплангани ва сув сатҳининг кўтарилиши янги сел келиши хавфини ошираётгани айтилмоқда. Шу сабабли айрим ҳудудларда қидирув-қутқарув ишлари вақтинча тўхтатилган.
Непал ва Хитой қутқарувчилари бедарак йўқолганларни қидиришда давом этмоқда. Непалда ҳарбий вертолётлар ва махсус гуруҳлар жалб қилинган, бироқ тоғли ҳудуддаги вайронагарчилик, йўлларнинг бузилиши ва янги сел хавфи қутқарув ишларини сезиларли даражада қийинлаштирмоқда.
Мутахассислар Ҳимолай минтақасида музликларнинг беқарорлашуви бундай табиий офатлар хавфини ошираётганини таъкидламоқда. Бироқ айнан ушбу фожиага иқлим ўзгаришининг тўғридан-тўғри таъсири бор-йўқлиги ҳозирча аниқ тасдиқланмаган.
Изоҳлар мавжуд емас