Ўзбекистон, Тошкент - Batafsil.uz. Дунёдаги энг йирик чип ишлаб чиқарувчи Nvidia компанияси асосчиси ва раҳбари Жэнсен Хуанг бир неча кун ичида иккита ишқий можаро марказида қолди. Аввал у Хитой махсус хизматлари билан алоқадорликда гумон қилинаётган тадбиркор аёл билан муносабатда бўлганини тан олди ва энди эса унинг компанияда бевосита ўзига бўйсунадиган юқори лавозимли ходима Кимберли Пауэлл билан ҳам ишқий муносабатда бўлгани ҳақида хабар тарқалди.
Бу воқеалар нафақат Хуангнинг шахсий ҳаёти, балки Nvidia раҳбарияти, компаниянинг корпоратив сиёсати ва АҚШ миллий хавфсизлиги билан боғлиқ саволларни ҳам келтириб чиқарган.
Аввалги можаро: Хитой билан боғлиқликда гумон қилинган аёл
Можаро октябрь ойи охирида бошланган. Ўшанда Хуангнинг Хитой фуқароси, тадбиркор Алис Хуанг билан яқин муносабатда бўлгани ҳақида маълумотлар пайдо бўлган. Уларнинг қариндошлиги йўқ.
Алис Хуанг Сингапурда фаолият юритувчи Megaspeed International компаниясида раҳбар лавозимида ишлаган. Бу компания Nvidia чипларининг йирик харидорларидан бири бўлган. Маълумотларга кўра, Megaspeed сўнгги икки йилда Nvidia компаниясидан 4,8 миллиард долларлик чип сотиб олган.
АҚШ махсус хизматлари Алис Хуанг Хитой разведкаси билан ҳамкорлик қилган ва Nvidia раҳбаридан маълумот олишга ҳаракат қилган бўлиши мумкин, деб гумон қилган. Шунингдек, компания чипларининг АҚШ экспорт чекловларини четлаб ўтиб Хитойга етказилиши эҳтимоли ҳам текширувга сабаб бўлган.
Бу маълумотлар эълон қилинганидан кейин Nvidia дастлаб Хуангнинг Алис билан учрашувлари оддий иш юзасидан бўлганини билдирган. Хуанг ҳам уларнинг мулоқотини мижозлар ва ҳамкорлар билан бўладиган одатий учрашувларга қиёслаган.
Бироқ кейинчалик вазият ўзгарган. 8 ноябрь куни Хуанг компания ходимларига йўллаган мактубида рафиқасига хиёнат қилганини тан олган ва оиласидан ҳамда ҳамкасбларидан узр сўраган.
Хуанг мактубида Алис Хуангнинг исмини тилга олмаган. Бироқ АҚШ матбуотидаги хабарлар унинг айнан шу аёл билан муносабатда бўлганини кўрсатган. Хуанг бу муносабатнинг давомийлиги ва бошқа тафсилотларини очиқламаган.
The Wall Street Journal нашри ёзишича, Алис Хуанг Nvidia раҳбари билан унинг эри — хитойлик тадбиркор Кан Вэй орқали танишган. Кан Вэй Жэнсен Хуанг билан ўн йилдан ортиқ вақтдан бери таниш бўлган ва бир неча йил аввал уни рафиқаси билан учраштирган. Нашр манбаларига кўра, тадбиркор бу орқали Nvidia билан алоқаларини мустаҳкамлаш ва тақчил чипларни етказиб бериш имкониятини қўлга киритишни кўзлаган.
Қайд этилишича, Кан Вэй рафиқаси билан Nvidia раҳбари ўртасидаги муносабатдан хабардор бўлган ва бунга қаршилик кўрсатмаган. У ҳатто ҳазил тариқасида Алис Хуангни «Жэнсен Хуангнинг шахсий ёрдамчиси» деб атаган.
Nvidia директорлар кенгаши текширув бошлади
8 ноябрь куни Nvidia директорлар кенгаши компания раҳбари хорижий разведка операцияси нишониga айланган бўлиши мумкинлиги ҳақидаги хабарлар юзасидан мустақил текширув бошланганини маълум қилган.
Текширувни мустақил директорлардан иборат қўмита ташқи ҳуқуқшунослар ёрдамида олиб бориши белгиланган. Компания ҳозирча миллий хавфсизлик ёки Nvidia нинг махфий маълумотлари зарар кўрганига ишончли асос йўқлигини билдирган. Хуанг текширувни қўллаб-қувватлашини ва ҳамкорлик қилишини айтган. Директорлар кенгаши дастлаб унинг раҳбарлигига ишонч билдирган бўлган.
Энди иккинчи аёл ҳақидаги хабар тарқалди
11 ноябрь куни Nvidia раҳбари яна бир аёл билан ишқий муносабатда бўлгани ҳақида хабар тарқалди. Гап компаниянинг соғлиқни сақлаш йўналиши бўйича вице-президенти Кимберли Пауэлл ҳақида кетмоқда.
48 ёшли Пауэлл Nvidia компаниясида 2008 йилдан буён ишлайди. У 2016 йилда сунъий интеллект соҳасида бизнесни ривожлантириш бўйича юқори лавозимга кўтарилган, 2017 йил охирида эса соғлиқни сақлаш йўналиши вице-президенти этиб тайинланган. У тиббий тасвирлаш, биология ва дори воситаларини яратишда сунъий интеллект технологияларидан фойдаланишга оид лойиҳалар билан шуғулланади.
Маълумотларга кўра, Хуанг ва Пауэлл ўртасидаги муносабат ҳақида компанияда аввалдан гап-сўзлар бўлган. Хорижий ОАВ бу маълумотни Nvidia да ишлаган беш нафар собиқ ходимга таяниб ёзган.
Уларнинг айтишича, Хуанг ва Пауэлл 2026 йил март ойида Сан-Хосе шаҳрида ўтказилган Nvidia GTC конференцияси вақтида меҳмонхонада бир-бирига яқин муносабатда бўлган. Икки манбанинг сўзларига кўра, уларни тасвирга олган гувоҳ ҳам бўлган. Бироқ хорижий нашрлар видеонинг ўзини кўрмаганини қайд этган.
Хуангнинг қўриқчилари телефонга тасвирга олаётган шахсни тўхтатиб, унга маълумотларни ошкор қилмаслик тўғрисидаги келишувни имзолашни таклиф қилган. Бу ҳолат ҳақидаги маълумотни газетанинг уч нафар суҳбатдоши тасдиқлаган.
Хуангдан Пауэлл билан муносабати ҳақида сўралганда, у журналистга: "Менимча, сиз бу саволни бевосита менга бермаслигингиз керак", деб жавоб берган ва суҳбатни якунлаган. Nvidia изоҳ беришдан бош тортган, Пауэлл эса хабар эълон қилинган вақтда журналистлар сўровига жавоб бермаган.
Муҳим жиҳати, бу муносабат ҳақидаги маълумотлар ҳозирча собиқ ходимларнинг гапларига асосланган. Хуанг ҳам, Пауэлл ҳам уни очиқ тасдиқламаган.
Изоҳлар мавжуд емас