Ўзбекистон, Тошкент - Batafsil.uz. Ўзбекистон Россиядан табиий газ харидини кўпайтирмоқда. "Газпром" маълумотига кўра, Марказий Осиё давлатлари, жумладан, Ўзбекистон, Қозоғистон ва Қирғизистон Россия гази импортини оширмоқда. Бироқ компания янги хабарда Ўзбекистон бўйича етказиб бериш ҳажми қанчага кўпайганини алоҳида очиқламаган.
Бу ҳақда "Газпром" бошқаруви йиғилишида жаҳон газ бозорининг ривожланиш истиқболлари муҳокама қилинганидан сўнг маълум қилинди.
Компания таъкидлашича, қайта тикланувчи энергия манбалари ривожланаётганига қарамай, табиий газ энергетика хавфсизлигини таъминлашда муҳим ўрин тутишда давом этмоқда. Россия гази экспортини кенгайтиришнинг асосий йўналишларидан бири Марказий Осиё ҳисобланади.
Ўзбекистон Россия газини 2023 йил октябридан бошлаб "Ўрта Осиё — Марказ" магистрал газ қувурлари тизими орқали импорт қила бошлаган. Бунинг учун қувурнинг бир қисми тескари йўналишда ишлаш режимига ўтказилган.
2025 йил якунларига кўра, Ўзбекистонга Россиядан 6,48 миллиард куб метр газ етказиб берилган. Бу 2024 йилдаги кўрсаткичдан қарийб 15 фоиз кўп.
Аввалроқ "Газпром" раҳбари Алексей Миллер 2026 йилда Ўзбекистон, Қозоғистон ва Қирғизистонга етказиб берилган газнинг умумий ҳажми қарийб 70 фоизга ошганини маълум қилганди. Бироқ бу кўрсаткич учала давлат бўйича жами натижани англатади ва Ўзбекистон импортининг алоҳида ўсиш суръатини билдирмайди.
Изоҳлар мавжуд емас