Ўзбекистон, Тошкент - Batafsil.uz. Ўзбекистонда 2026 йил куз-қиш мавсуми учун аҳолига 1,53 миллион тонна кўмир етказиб бериш режалаштирилган. 12 ноябрь ҳолатига тадбиркорлар томонидан 308,7 минг тонна кўмир сотилган, яна 125,6 минг тонна маҳсулот аҳолига етказиб бериш учун йўлда.
Бу ҳақда 2026–2027 йиллар куз-қиш мавсумида аҳолини кўмир билан таъминлаш масалаларига бағишланган брифингда маълум қилинди.
"Ўзбеккўмир" акциядорлик жамияти 2026 йилда жами 5,7 миллион тонна кўмир қазиб олишни режалаштирган. Шундан 1 миллион 530 минг тоннаси аҳоли эҳтиёжлари учун йўналтирилиши кўзда тутилган.
Жорий йилнинг январь–октябрь ойларида 5,488 миллион тоннадан зиёд кўмир қазиб олинган. Истеъмолчиларга эса 4,784 миллион тоннадан ортиқ маҳсулот етказиб берилган.
12 ноябрь ҳолатига кўра, аҳоли эҳтиёжлари учун биржа савдоларига 1 миллион 48 минг 461 тонна кўмир чиқарилган. Тадбиркорлар шундан 987 минг 556 тонна маҳсулотни харид қилган. Харид қилинган кўмирнинг 542 минг 776 тоннаси конлардан жўнатилган, 417 минг 136 тоннаси эса қабул қилиб олинган.
Айни пайтда тадбиркорларнинг омборларида 108 минг 402 тонна кўмир мавжуд. Республика бўйича аҳолига кўмир сотиш ва етказиб бериш билан 89 та тадбиркорлик субъекти шуғулланмоқда.
Кўмир таъминотида бозор механизмлари Вазирлар Маҳкамасининг 2026 йил 30 июлдаги 418-сон қарори асосида жорий этилган. Эндиликда аҳоли кўмирни тадбиркорлар орқали харид қилади. Бунинг учун яратилган Uzbekcoal.uz платформасида бир нечта таклифни солиштириш, сотувчини танлаш, буюртма бериш ва унинг ҳолатини кузатиш мумкин.
Кўмирнинг якуний нархи биржадаги харид қиймати, юклаш, ташиш ва бошқа харажатлардан келиб чиқиб белгиланади. Шу сабабли сотувчи тадбиркорлар маҳсулот нархи ва уни етказиб бериш шартлари учун масъул ҳисобланади.
Ижтимоий реестрга киритилган оилаларга эса платформа орқали харид қилинган ҳар бир тонна кўмир учун 300 минг сўмдан компенсация берилади. Бир календарь йилдаги компенсациянинг умумий миқдори 600 минг сўмгача етиши мумкин.
Масъуллар кўмир конлардан ўз вақтида жўнатилмаган тақдирда "Ўзбеккўмир" акциядорлик жамиятига, омбордаги мавжудлик, сотиш нархи ва етказиб бериш билан боғлиқ масалалар бўйича эса сотувчи тадбиркорларга мурожаат қилиш кераклигини билдирган.
Изоҳлар мавжуд емас