Ўзбекистон, Тошкент - Batafsil.uz. Қозоғистоннинг икки қишлоғида куйдирги туфайли карантин жорий этилди. Чеклов чоралари касаллик аниқланган Ақмола вилояти Атбасар туманидаги аҳоли пунктларида жорий этилди. Беморларнинг 7 нафарида касаллик тасдиқланган, улардан 1 нафарининг аҳволи оғир.
Маълумотни Қишлоқ хўжалиги вазири Айдарбек Сапаров тасдиқлади.
Қайд этилишича, июнь ойи охирида Қозоғистон соғлиқни сақлаш вазири Акмарал Алназарова Атбасар туманида тўрт киши куйдирги билан касалланганини маълум қилган. Беморларнинг аҳволи ўртача оғирликда баҳоланди. Вазир уларга зарур тиббий ёрдам кўрсатилаётгани, эпидемияга қарши чора-тадбирлар амалга оширилаётганини маълум қилди.
Ўшанда Алназарова туманда карантин жорий этилмаслигини айтганди.
Аммо бир кун олдин Атбасарда карантин жорий этилди. Шу билан бирга, касалланиш ҳолатлари аниқланган қишлоқларда дастлаб чеклов чоралари жорий этилди.
"Ҳеч қандай чорва ҳаракати, одамлар - у ерга кириш мумкин эмас. Атрофни ўраб, шлагбаум қўйдик. Республика эпизоотияга қарши отряди ўз ишини дезинфекция, ишлов бериш, утилизация қилишдан бошлади. Лаборатория хулосасини олгач, дарҳол 1 июлдан карантин эълон қилдик," - деди Сапаров.
Аниқлик киритилишича, таҳлиллар 19 кишидан олинган: етти ҳолатда куйдирги тасдиқланган, қолган 12 тасида манфий натижа қайд этилган.
Карантин 15 кун давом этади. Шундан сўнг текшириш учун янги намуналар олинади. Куйдирги касаллиги тасдиқланмаса, карантин чоралари бекор қилинади.
Эслатиб ўтамиз, Қозоғистонда 2024 йил охирида куйдирги касаллиги туфайли чорва моллари учун мажбурий карантин жорий этилган эди.
Изоҳлар мавжуд емас