Ўзбекистон, Тошкент - Batafsil.uz. Шри-ланкалик 24 ёшли меҳнат мигранти Сивараса Аножан Саудия Арабистонида Facebook ижтимоий тармоғида Ислом дини ва Муҳаммад пайғамбарни ҳақорат қилганликда айбланиб, ўлим жазосига ҳукм қилинди. Апелляция суди прокуратуранинг талаби билан илгари берилган жазони кескин оғирлаштирган.
Иш тафсилотларига кўра, келишмовчилик Шри-ланкадаги ҳиндулар зиёрати чоғида ижтимоий тармоқларда ҳиндулик эътиқоди ва маъбудлари шаънига айтилган ҳақоратли изоҳлардан сўнг бошланган. Бунга жавобан Аножан Ислом динига нисбатан салбий изоҳ қолдирган.
Можародан сўнг у ўз изоҳини ўчириб ташлаган ва кечирим сўраб видеожойлаштирган бўлса-да, унинг ёзгани аллақачон нусхалаб олиниб, Саудия ҳукуматига хабар қилинган. 2025 йилнинг сентябрь ойида Саудияга ишлагани келган Аножан 2026 йил 2 июлда ҳибсга олинган.
Биринчи инстанцияда Аль-Аҳса жиноят суди мигрантни Кибержиноятларга қарши кураш қонуни асосида 5 йилга озодликдан маҳрум қилиш ва 3 миллион Саудия риёли (содир этилган қилмиш учун) жаримага тортиш ҳақида ҳукм чиқарган эди. Бироқ прокуратура Шариат қонунлари асосида оғирроқ жазо талаб қилиб апелляция берган ва жорий йилнинг 17 сентябрь куни Апелляция суди уни ўлим жазосига маҳкум этган.
Шри-Ланка Ташқи ишлар вазирлиги мазкур вазиятни назоратга олиб, барча консуллик ва дипломатик имкониятларни ишга солмоқда. Ташқи ишлар вазири Вижита Ҳератнинг маълум қилишича, Шри-Ланка ҳукумати мигрантнинг барча юридик харажатларини ўз зиммасига олади.
Шунингдек, Шри-Ланка Президенти Анура Кумара Диссанаякенинг Саудия Арабистони Подшоҳига йўлланган афв этиш ҳақидаги мактубини етказиш учун Ар-Риёдга махсус делегация юбориш режалаштирилмоқда.
Олдинроқ Туркияда Қуръонни ва президентни ҳақорат қилган стендапчи Дениз Кўктошга узоқ йиллик қамоқ жазоси сўралганди.
Изоҳлар мавжуд емас