Ўзбекистон, Тошкент - Batafsil.uz. Туркияда YouTube платформасида жойлаштирилган Ölü Deniz (Ўлик денгиз) номли стендап комедия кўрсатувидаги чиқишлари сабабли Дениз Кўктош ҳибсга олинди. Истанбул 14-аслия жиноят судида кўриб чиқилаётган жиноят иши доирасида прокуратура учта алоҳида модда бўйича комикка нисбатан 2 йил 7 ойдан 12 йил 2 ойгача озодликдан маҳрум қилиш жазосини сўрамоқда.
Маълумотларга кўра, Дениз Кўктош жорий йилнинг 2 июль куни Истанбул аэропортида ушланган ва 3 июль куни қамоққа олиниб, Чорлу Каратепе юқори хавфсизликдаги қамоқхонасига жойлаштирилган. Август ойи охирида суд уни озод қилиш ҳақида қарор чиқарган бўлса-да, прокуратуранинг эътирози ва янги айблов эълон қилиниши ортидан у қамоқхонадан чиқарилмай, ҳибсда қолдирилган.
Истанбул Бош прокуратураси томонидан тайёрланган айблов хулосасида кўра, қизиқчининг мамлакат президенти Режеп Таййип Эрдоған ҳақида айтган "диктатор" ибораси ҳамда унинг терапевти бўлиш ҳақидаги ҳазил шаклидаги гаплари танқид чегарасидан чиққан ва президентнинг шаъни ҳамда қадр-қимматини камситувчи деб баҳоланган.
Шунингдек, унинг рўза тутувчилар ва диний қарашлари сабабли ёпиқ либосда (ҳашемада) чўмилувчи аёллар (саҳнада "ғаввослар" деб атаган) шаънига айтган ҳазиллари, шунингдек, Қуръон таржимасига оид фикрлари жамиятда диний эътиқодга кўра бўлиниш ва адоват уйғотишга қаратилган деб топилган. Мазкур кўрсатув юзасидан Президент аппарати мурожаатлар марказига 500 дан ортиқ шикоят тушгани таъкидланмоқда.
Кўктошнинг саҳнада рақиб комедиячини йўқ қилиш учун криминал тўдалар ("Далтонлар" тўдаси) хизматидан фойдаланиш ва криптовалюта орқали тўлов қилиш мумкинлиги ҳақидаги ҳазили жиноий гуруҳлар фаолиятини жозибадор кўрсатиш ва жиноятга ундаш сифатида малакаланган.
Дениз Кўктошнинг ўзи эса берилган кўрсатмаларида айбловларни рад этиб, барча билдирилган фикрлар соф комедия ва юмшоқ сатира доирасида айтилганини маълум қилди. Унинг таъкидлашича, диний қадриятларни ёки жамиятнинг бирор қатламини камситиш, шунингдек, президентга ҳақорат етказиш нияти бўлмаган, президент ҳақидаги гаплари эса шунчаки сиёсий кузатув ва саҳнавий ҳазилдан иборат.
Ҳозирда Туркияда мазкур кўрсатув видеосига кириш блокланган бўлиб, суд жараёнлари ва гумонланувчининг ҳибсда ушлаб турилиш мақоми бўйича текширувлар давом этмоқда.
Эслатиб ўтамиз, олдинроқ Истанбулда Арас Булут Ийнемли, Sefo ва Мелис Сезен каби машҳурлар навбатдаги гиёҳвандлик операциясида ушланганди.
Изоҳлар мавжуд емас