Ўзбекистон, Тошкент - Batafsil.uz. Tesla компанияси тўққиз йилга яқин кечикишдан сўнг иккинчи авлод Roadster электр спорт автомобилини расман намойиш этди. Тадбир 15 октябрь куни Техас штатидаги SpaceX ракета синов майдонида бўлиб ўтди. Тақдимот одатий автомобиль намойишидан кўра кўпроқ каскадёрлик шоусини эслатган.
Оқ рангли икки ўринли автомобиль катта эгри рампага кўтарилган. Компания маълумотига кўра, Roadster уч хил кўринишда чиқарилади. Икки ўринли асосий Performance версияси фаол аэродинамика ва сўрувчи тизимга эга. У соатига 97 километр (60 миля) тезликка 1,6 сониядан кам вақтда чиқади. Орқа трастерлар қўшилган Thrust версиясида бу кўрсаткич 0,9 сониягача қисқаради. Бир ўринли Rocket эса қўшимча трастерлар ёрдамида ердан кўтарила олади.
Tesla унинг тезланишини 0,59 сониядан кам деб кўрсатган. Барча версиялар учун 480 километрдан ортиқ юриш масофаси ва соатига 370 километрдан юқори тезлик ваъда қилинмоқда. Тадбирда эса автомобиль 0,81 сонияда соатига 97 километрга чиққани намойиш этилган.
Якуний нарх эълон қилинмади. Сайтдаги маълумотга кўра, Performance версиясини брон қилиш учун 50 минг, Thrust учун эса 250 минг доллар тўлаш керак. Rocket фақат таклиф асосида берилади. У умумий йўлларда фойдаланишга рухсат олмаган. Брон шартномасида Tesla автомобиль қачон, ҳатто умуман етказиб берилишини кафолатлай олмаслиги ёзилган.
Маск ўзи ҳам бу "хавфсизлик учун оптималлаштирилган автомобиль бўлиши шарт эмас", дея тан олган. У автомобильнинг ҳамма давлатда қонуний бўлишига ишончи комил эмаслигини ҳам айтган.
Танқидчилардан бири тадбирни "анъанавий автомобиль ишлаб чиқарувчиларни хижолатга қўйишдан бошқа тижорий қиймати йўқ муҳандислик кўз-кўзи" деб атаган. Morningstar таҳлилчиси Сет Голдстейн эса Tesla йилига 2 мингга яқин Roadster сотишини кутмоқда.
Бу компаниянинг ўтган йилги 1,6 миллион автомобиллик сотуви олдида жуда кичик рақам.
Олдинроқ Номаълум шахслар Орегон штатининг Салем шаҳридаги Тесла шоурумини ўққа тутганди ва Илон Маскка ўлим тилаб таҳдидли мактуб қолдирганди.
Изоҳлар мавжуд емас