Ўзбекистон, Тошкент - Batafsil.uz. Европа комиссияси АҚШ ва Исроилнинг Эронга қарши ҳарбий ҳаракатлари бошланганидан буён Иттифоқ давлатлари кўрган энергетик йўқотишларни очиқлади. Ҳисоб-китобларга кўра, Европа иқтисодиёти энергия ресурслари нархи ошиши туфайли ҳар куни ўртача 500 миллион евро маблағ йўқотмоқда.
Европанинг энергетика масалалари бўйича комиссари Дан Йергенсен Брюсселда ўтказилган матбуот анжуманида маълум қилишича, низо бошланганидан буён умумий харажатлар 24 миллиард еврога етган. Бу ҳолат нафақат саноат тармоқлари, балки барча Европа мамлакатлари аҳолиси учун ҳам сезиларли молиявий қийинчиликларни юзага келтирган.
Европа комиссияси раҳбари Урсула фон дер Ляйен вазиятни юмшатиш мақсадида 23 апрель куни ўтадиган саммитда Евроиттифоқнинг нефть захираларидан фойдаланишни таклиф қилишини билдирган. Бу чора бозордаги нархларни барқарорлаштириш ва импорт харажатларини камайтиришга қаратилган. Маълумотларга кўра, конфликт бошланганидан буён энергия импорти учун сарфланадиган маблағлар 22 миллиард еврога ошган.
Шу билан бирга, халқаро экспертлар ва Politico нашри Европа Иттифоқининг ташқи сиёсий муваффақиятсизликлари, хусусан Украинани молиялаштириш ва Эрон масаласидаги тарқоқ позицияси ташкилотда "тизимли фалажлик" юзага келганидан далолат бераётганини қайд этмоқда.
Изоҳлар мавжуд емас