Ўзбекистон, Тошкент - Batafsil.uz. Маданий мерос агентлигининг Тошкент шаҳри, Бобур кўчаси 7-уйда жойлашган бино атрофидаги танқидларга билдирган муносабати Алишер Қодировнинг яна бир кескин эътирозига сабаб бўлди. "Миллий тикланиш” партияси раҳбари агентлик ижтимоий тармоқларда баёнот бериш ўрнига, парламент аъзолари олдида бюджет маблағларининг сарфланиши ҳамда Сармишсой, Шоҳизинда каби ноёб тарихий мажмуаларнинг бугунги аҳволи бўйича аниқ ҳисобот бериши шартлигини таъкидлади.
Датлаб Алишер Қодиров пойтахтнинг Бобур кўчасидаги 7-уй ("рус рассомининг уйи" сифатида танилган) каби эски биноларни муҳофаза қилиш заруратига шубҳа билдириб, уларнинг жамият учун қиймати юқори эмаслигини таъкидлаган эди. Унинг фикрича, агентлик шу каби объектларга эътибор қаратаётган бир пайтда, минг йиллик миллий-тарихий меросимиз қаровсиз ва муаммолар ичида қолмоқда.
Бунга жавобан Маданий мерос агентлиги вакиллари 1935 йилда қурилган ушбу бино таниқли меъмор Алексей Щусев ҳамда бир қатор ўзбек ва шарқшунос олимларнинг тарихи билан боғлиқлигини, 2020 йилда Миллий рўйхатга киритилганини тушунтирди. Агентлик раҳбарияти тарихий меросни муҳофаза қилишда уни яратган шахсларнинг миллатига қараб ажратиш нотўғри эканини ва "маданий мероснинг миллати бўлмаслигини" билдирган. Блогер ва жамоат фаоли Ислом Капарзо ҳам ушбу позицияни қўллаб-қувватлаб, Тошкентдаги кўплаб меъморий обидалар, жумладан, Алишер Навоий номидаги театр биноси ҳам турли миллат вакиллари томонидан барпо этилганини эслатиб ўтган.
Юзага келган баҳс ортидан Алишер Қодиров Маданий мерос агентлигининг ижтимоий тармоқлардаги муносабатига қатъий эътироз билдирган. Депутатнинг таъкидлашича, агентлик парламент минбарида берилган аниқ ва асосли саволларга мазмунан жавоб бериш ўрнига, масалани сунъий равишда миллатлараро тарангликка боғлашга ва провокация қилишга уринмоқда.
Қодиров Агентлик эътиборсиз қолдирган ва ҳанузгача жавоб кутилаётган асосий саволларни яна бир бор кун тартибига қўйган. Хусусан, расмий ўз нутқида қуйидаги саволларни ўртага ташлаган:
-
Нима учун Сармишсойдек ноёб очиқ осмон остидаги музейга миллиардлаб маблағ ажратилган бўлса-да, унинг гектарлаб ҳудуди қаровсиз ва ташландиқ аҳволда?
-
Шоҳизинда хавф остида қолиб, оғиб бораётгани ва ёнгинасидан ўтган автойўл унга жиддий зарар етказаётганига қарамай, нега ташаббус кўрсатилиб, ҳокимлик судга берилмаяпти?
-
Нима сабабдан Бухородаги энг қадимий Қуръон нусхаларидан бири Аркнинг талабга жавоб бермайдиган омборида сақланмоқда?
-
Нима учун буюк давлатчилигимиз тарихи билан боғлиқ бўлган Довон давлати қолдиқлари жойлашган ҳудудлар деҳқончилик учун бериб юборилган ва у ерда археологик қазишмалар олиб борилмаяпти?
"Депутатга муносабат — халққа муносабатдир" деган тамойилни эслатган Алишер Қодиров, агентлик тармоқларда баёнотлар бериш ўрнига, ажратилган бюджет маблағларининг сарфланиши бўйича халқ вакиллари олдида шаффоф ҳисобот бериши шартлигини таъкидлаган. Парламент аъзоси агар Агентлик томонидан жўяли ва асосли жавоблар тақдим этилмаса, ўз ваколатлари доирасида Парламент сўрови ҳамда Парламент эшитуви механизмларини ишга солишга тайёр эканлигини маълум қилган.
Изоҳлар мавжуд емас