Ўзбекистон, Тошкент - Batafsil.uz. Ўзбекистонда хизмат кўрсатган артист, таниқли актёр Рустам Сагдуллаев Россиянинг Псков шаҳрида бўлиб ўтган "Ғарбий дарвоза" VII халқаро кинофестивалида "Кинода ҳаёт" фахрий халқаро мукофотига сазовор бўлди.
Рустам Сагдуллаев ўзбек киносининг энг машҳур актёрларидан бири бўлиб, унинг ижоди Ўзбекистонда ва ундан ташқарида бир неча авлод томошабинларига яхши таниш. Ушбу мукофот унинг кўп йиллик меҳнати, ўзбек кинематографиясини ривожлантириш ва уни хорижда оммалаштиришга қўшган салмоқли ҳиссасининг эътирофи бўлди.
Фестиваль давомида Рустам Сагдуллаев нафақат табрикларни қабул қилди, балки турли мамлакатлардан келган ҳамкасблари билан биргаликда танлов фильмларини баҳолаб, халқаро ҳакамлар ҳайъати таркибида ҳам ишлади.
Ўзбекистон Маданият вазирлиги актёрни нуфузли мукофот билан табриклаб, бу унинг кўп йиллик меҳнати ва профессионал маҳоратининг муносиб эътирофи эканлигини таъкидлади.
Аввалроқ Сагдуллаев "Маданият ва санъатга қўшган улкан ҳиссаси учун" номинациясида МДҲнинг "Ҳамдўстлик юлдузлари" мукофоти лауреати бўлганди.
Изоҳлар мавжуд емас