Ўзбекистон, Тошкент - Batafsil.uz. "Ўзбекгидроэнерго" ва Хитойнинг ТВЕА энергетика компанияси Тошкент вилоятидаги Қуйи Бўзсув каскадининг бир вақтнинг ўзида учта гидроэлектр станцияси - ГЭС-19, ГЭС-22 ва ГЭС-23ни модернизация қилиш бўйича шартномалар имзолади.
Лойиҳа EPC - Engineering, Procurement, Construction (Лойиҳалаш, харид қилиш, қурилиш), яъни "тайёр ҳолда топшириш" схемаси бўйича амалга оширилади. Пудратчи лойиҳалашдан тортиб объектларни фойдаланишга топширишгача бўлган ишларнинг бутун циклини ўз зиммасига олади. Халқаро тендер натижаларига кўра, бутун дунё бўйлаб инфратузилма лойиҳаларини амалга оширишда катта тажрибага эга бўлган Хитойнинг энг йирик энергетика корпорацияларидан бири TBEA компанияси ғолиб бўлди.
ТВЕА таклифи технология, самарадорлик ва бошқарув ёндашуви нуқтаи назаридан мақбул деб топилди. Компания станциялар ишининг ишончлилигини ошириш ва уларнинг ишлаб чиқариш кўрсаткичларини ошириш, шунингдек, узоқ муддатли ҳамкорлик учун асос яратишга имкон берадиган замонавий ечимларни таклиф қилди.
Модернизация натижасида 3 та гидроэлектр станциянинг жами ўрнатилган қуввати 27,4 мегаваттдан 32,4 мегаваттгача ошади. Бунинг эвазига йилига қўшимча қарийб 52,8 миллион киловатт-соат электр энергияси ишлаб чиқарилиб, 21 мингдан зиёд хонадонни таъминлашга етади. Шу билан бирга, лойиҳа йилига қарийб 17 миллион куб метр табиий газ ва 40 минг тоннадан ортиқ кўмирни тежаш имконини беради.
Станцияларда бошқарув тизимлари ва технологик ускуналар янгиланади, бу эса уларнинг хавфсизлиги ва барқарорлигини оширади. Шунингдек, лойиҳа "яшил" энергетикани ривожлантириш ва минтақанинг энергия хавфсизлигини мустаҳкамлашга хизмат қилади.
"Ўзбекгидроэнерго" таъкидлашича, ТВЕА билан ҳамкорлик фақат ушбу лойиҳа билан чекланиб қолмайди. Келгусида томонлар Ўзбекистонда инновацион технологияларни жорий этиш ва экологик барқарор энергетикани ривожлантириш билан боғлиқ бошқа ташаббусларни ҳам амалга оширишни режалаштирмоқда.
Аввалроқ, Ислом Абдураҳмонов "Ўзбекгидроэнерго" акциядорлик жамияти бошқарувининг янги раиси этиб тайинланганди. У бу лавозимда компанияни саккиз йил давомида бошқарган отаси Абдуғани Сангинов ўрнини эгаллади.
Изоҳлар мавжуд емас