Ўзбекистон, Тошкент - Batafsil.uz. Россиядаги Wildberries маркетплейсини бошқарувчи Wildberries масъулияти чекланган жамиятининг янги бош директори Алексей Куликов бўлди. Ушбу лавозимда 2004 йилда компанияга асос солган Татьяна Кимни алмаштирди, ўзгаришлар Россия юридик шахслар давлат реестрида қайд этилди.
Хорижий ОАВ маълумотларига кўра, Куликов 20 ноябрь куни раҳбар этиб тайинланган. У шунингдек, Wildberries экотизимига кирувчи "ВБ Инжиниринг" компанияси ва "АПР-Сити/ТВД" реклама агентлигини ҳам бошқаради.
Кадрлар ўзгариши компаниянинг мулкчилик таркибидаги янгиланишлар билан бир вақтга тўғри келган.
19 ноябрда Wildberries ва Russ бирлашган компанияси — RWB таъсисчилари улуши қайта тақсимланган. Wildberries компаниясининг улуши 65 фоиздан 45 фоизга, "Стинн"ники эса 35 фоиздан 25 фоизга камайган.
Қолган 30 фоиз икки ёпиқ инвестиция фондига ўтган. RWB бу ўзгаришларни активларни мақбуллаштириш ва масъулиятни қайта тақсимлаш билан изоҳлаган. Татьяна Ким 16 ноябрь куни Европа Иттифоқининг санкциялар рўйхатига киритилган.
Европа Иттифоқи ҳужжатида Wildberries Россия ҳарбийларига ҳарбий ва икки мақсадда ишлатиладиган маҳсулотлар етказиб берилишига кўмаклашувчи тармоқ сифатида қайд этилган.
Компания ва Россия ҳукумати эса ҳарбий таъминотга оид айбловларни рад этган.
Аввалроқ Ўзбекистон Инвестициялар, саноат ва савдо вазирлиги ҳамда Wildberries компанияси республикада "А" синфидаги йирик логистика мажмуасини барпо этиш бўйича инвестиция битимини имзолаганди.

Изоҳлар мавжуд емас