Ўзбекистон, Тошкент - Batafsil.uz. Халқаро валюта жамғармаси ҳисоботига кўра, 2024 йилда Ўзбекистондаги 2148 та давлат корхонасининг фақат 982 таси фойда кўрган. Энг катта молиявий йўқотишлар энергетика, уй-жой коммунал хўжалиги ва сув хўжалиги соҳаларида қайд этилган.
Халқаро валюта жамғармасининг Selected Issues ҳисоботида қайд этилишича, қолган давлат корхоналари зарар билан ишлаган, фаолият юритмаган, тугатилиш жараёнида бўлган ёки молиявий натижаларини ошкор қилмаган. Ҳисобот Давлат активларини бошқариш агентлиги маълумотлари асосида тайёрланган.
Ҳужжатга кўра, давлат корхоналари орасида энг юқори даромад тоғ-кон саноати ҳиссасига тўғри келган. Нефть-газ ҳамда банк-молия соҳалари кейинги ўринларни эгаллаган. Энг катта молиявий йўқотишлар эса электр энергетикаси, уй-жой коммунал хизматлари ва сув хўжалиги тармоқларида кузатилган. ХВЖ бу ҳолатни аҳолига кўрсатилган хизматлар харажатлари тўлиқ қопланмаётгани билан изоҳлаган.
Ҳисоботда давлат корхоналари бюджетга тўлаган дивидендларнинг қарийб 80 фоизи тоғ-кон саноати ҳиссасига тўғри келиши қайд этилган. Нефть-газ соҳаси 9,5 фоизни таъминлаган бўлса, қолган барча тармоқлар улуши жами 10,5 фоизни ташкил этган. Жамғарма бу ҳолат давлат активларининг катта қисми етарлича даромад келтирмаётганини англатишини таъкидлаган.
Шунингдек, улар халқаро молиявий ҳисобот стандартлари бўйича аудитдан ўтган 21 та йирик давлат корхонасини ҳам таҳлил қилган. Маълумотлари мавжуд 16 та корхонанинг аксарияти 2024 йилда молиявий кўрсаткичларини яхшилаган. Бу, асосан, электр энергияси ва газ тарифлари оширилганидан кейин энергетика ҳамда газ соҳасидаги компаниялар аҳволи яхшилангани билан боғланган.
Шу билан бирга, ХВЖ давлат корхоналари ҳали ҳам бюджет субсидиялари, давлат кафолатлари, имтиёзли кредитлар ва бошқа молиявий қўллаб-қувватлаш механизмларига юқори даражада таяниб келаётганини қайд этган. Жамғарма давлат корхоналарида корпоратив бошқарувни кучайтириш, фаолиятни бозор тамойиллари асосида ташкил этиш ҳамда давлат кўмагини босқичма-босқич қисқартиришни тавсия қилган.
Изоҳлар мавжуд емас