Ўзбекистон, Тошкент - Batafsil.uz. Жорий йилнинг 5 октябрь куни Ўзбекистон Республикаси Президенти Шавкат Мирзиёев "Мустақилликнинг 25 йиллиги" конида юзага келган аварияни бартараф этиш борасидаги ишлар тақдимоти билан танишди. Билдирилишича, ушбу жараёнга Хитойнинг ихтисослашган компанияси жалб этилган.
Давлат раҳбари аварияни бартараф этиш жараёнининг сифати ва барча босқичларида хавфсизлик талабларига қатъий риоя этилишини таъминлаш энг муҳим масала эканини алоҳида таъкидлаган.
Тақдимотда "Ўзбекнефтгаз" акциядорлик жамияти томонидан соҳадаги геология-қидирув ишларини кенгайтириш ва табиий газ қазиб чиқариш кўрсаткичларини оширишга доир муҳим тадбирлар ҳам атрофлича кўриб чиқилган.
Жорий йилда "Ўзбекнефтгаз" фаолиятини такомиллаштиришга қаратилган иккита қарор қабул қилинган бўлиб, газ захираларини кўпайтириш мақсадида 3D сейсмик разведка ишлари ҳажмини ўтган йилга нисбатан 5 баробарга ошириш режалаштирилмоқда.
Йил бошидан буён 5 та янги газ конлари очилган ҳамда ҳудудларда 6000 метр ва ундан ортиқ чуқурликларга 80 та қудуқ бурғиланган. Тўртинчи чоракда ушбу қудуқлардан яна 40 тасида бурғилаш ишларини олиб бориш кўзда тутилган.
Айниқса Устюртнинг катта чуқурликдаги қатламларини ўрганиш ва газ қазиб олиш самарадорлигини ошириш бўйича хорижий ҳамкорлар билан биргаликда қатор истиқболли лойиҳалар амалга оширилмоқда.
Шу билан бирга, "Ўзбекнефтгаз" АЖ ва унинг тасарруфидаги корхоналарнинг молиявий кўрсаткичлари таҳлил қилинган. Тўққиз ой якуни билан корхоналарнинг жамланган соф фойдаси ўтган йилнинг мос даврига нисбатан ошган, юқори фоизли кредитлар шартларини қайта кўриб чиқиш эвазига қарздорлик камайтирилган.
Газ транспорт тизимининг ўтказувчанлик қувватини ошириш, янги магистрал газ қувурларини қуриш ҳамда компрессор станцияларини модернизация қилиш орқали йилига 125 миллион куб метр газ тежалиши таъкидланган.
Бундан ташқари, Фарғона нефтни қайта ишлаш заводида ишлаб чиқаришни кўпайтириш ва уни молиявий соғломлаштириш бўйича маълумот берилган.
Асосий технологик қурилмалар таъмирланиши натижасида заводда дизель ёнилғиси ишлаб чиқариш 30 фоизга, битум 60 фоизга, авиакеросин эса 5 баробарга ошган.
Келгусида заводни хомашё билан барқарор таъминлаш ва йил охирига қадар унинг қувватларидан фойдаланиш юкламасини 40 фоиздан 65 фоизга етказиш режалаштирилган.
Тақдимот якунида Президент геология-қидирув ва бурғилаш ишлари натижадорлигини ошириш ҳамда йирик лойиҳаларни пухта ҳисоб-китоб асосида амалга ошириш юзасидан масъулларга тегишли кўрсатмалар берган.
Олдинроқ суд “Ўзбекнефтгаз”нинг экологик жаримасини қарийб 13 минг бараварга камайтирганди.
Изоҳлар мавжуд емас