Ўзбекистон, Тошкент - Batafsil.uz. Ўзбекистонда рақобат ва реклама тўғрисидаги қонун ҳужжатлари бузилганлиги ҳақида хабар берган фуқаролар ҳамда ташкилотларни пул мукофоти билан рағбатлантириш тизими жорий этилиши мумкин. Бу борада Вазирлар Маҳкамасининг тегишли қарори лойиҳаси жамоатчилик муҳокамаси учун эълон қилинди.
Янги ҳужжатга кўра, картель келишувлари, рақобатга зид бошқа келишувлар ва реклама соҳасидаги қонунбузарликлар тўғрисида аниқ маълумот тақдим этган шахсларга, агар ушбу хабарлар текширув давомида ўз тасдиғини топса ва айбдорлардан жарима ундирилса, пул мукофотлари берилиши кўзда тутилмоқда.
Лойиҳада белгиланган тартибга асосан, мукофот миқдорлари содир этилган қоидабузарлик тури ва ундирилган жарима ҳажмига қараб тақсимланади.
Хусусан, рақобатга қарши тил бириктириш ва келишувлар ҳақида хабар берганлар ундирилган жарима суммасининг 3 фоизи миқдорида пул олишлари мумкин, бироқ бу маблағ базавий ҳисоблаш миқдорининг 100 бараваридан, яъни 41,2 миллион сўмдан ошиб кетмайди.
Реклама тўғрисидаги қонунчилик бузилиши ҳолатлари учун эса ундирилган жариманинг 10 фоизи миқдорида рағбатлантириш тўланиши белгиланмоқда, бунда энг юқори чегара БҲМнинг 10 баравари этиб белгиланган.
Мазкур тўловлар Рақобатни ривожлантириш ва истеъмолчилар ҳуқуқларини ҳимоя қилиш қўмитаси ҳузуридаги бюджетдан ташқари жамғармага жарима маблағлари келиб тушганидан сўнг амалга оширилади.
Бозордаги қоидабузарликлар ҳақидаги маълумотларни масъул идораларга оғзаки, ёзма, электрон шаклда ёки махсус ишонч телефонлари орқали йўллаш имконияти яратилади.
Мурожаатда содир этилган ҳолат тавсифи, гумонланувчи шахс ёки компания маълумотлари, далиллар ёхуд уларни олиш манбалари, шунингдек, ариза берувчининг қайта боғланиш учун маълумотлари кўрсатилиши лозим.
Муҳим жиҳати шундаки, қонунбузарлик ҳақида хабар берган шахсларнинг маҳфийлиги давлат томонидан тўлиқ кафолатланади ва уларнинг шахсини ноқонуний ошкор қилганлик учун қатъий жавобгарлик чоралари кўрилади. Аноним тарзда йўлланган мурожаатлар ҳам тизимни соғломлаштириш ва таҳлил қилиш учун ўрганиб чиқилади, бироқ бундай ҳолатларда пул мукофоти тўланмайди.
Агар тақдим этилган маълумотлар асоссиз бўлиб чиқса ёки текширув давомида қонунбузарлик ҳолати тасдиқланмаса, ҳеч қандай маблағ ажратилмайди. Жарима қўлланилмайдиган, аммо бартараф этилиши лозим бўлган кичик камчиликлар ҳақида хабар берган фаол фуқаролар эса ташаккурномалар ва бошқа турдаги номоддий чоралар билан рағбатлантирилиши кўзда тутилган.
Изоҳлар мавжуд емас