Ўзбекистон, Тошкент - Batafsil.uz. Сўнгги 9 та сессия давомида ўзбек сўми долларга нисбатан 2 фоизга қадрсизланиб, йил бошидан бери эришган барча мустаҳкамланишини бой берди. Бунинг оқибатида долларнинг расмий курси 31 июлдан бери энг юқори даражага кўтарилди.
Сўмнинг арзонлашишига, энг аввало, глобал миқёсда долларнинг мустаҳкамланиши сабаб бўлмоқда. АҚШда инфляциянинг тезлашиши ва Федерал захира тизими томонидан фоиз ставкаларининг оширилиши фонида дунё бўйлаб аксарият валюталар, жумладан сўм ҳам қадрсизланган.
Шу билан бирга, валюта курсига ички омиллар ҳам таъсир кўрсатмоқда.
Хусусан, учинчи чорак якунида ҳукумат ва хусусий секторнинг ташқи қарзлар бўйича бир марталик тўловлари валютага бўлган талабни оширган бўлиши мумкин.
Бундан ташқари, жорий йилда мамлакатимизда олтин экспорти камайгани сабабли Марказий банкнинг валюта интервенциялари имконияти чекланган, ёз мавсуми тугаши билан эса хориждан пул ўтказмалари оқими мавсумий равишда секинлашган.
Шунга қарамай, мослашувчан курснинг ички ва ташқи ўзгаришларга бундай муносабат билдириши бозорнинг табиий жараёнидир. Мамлакатда экспорт ва инвестициялар фаол ўсаётгани сабабли сўмнинг сурункали ва кескин қадрсизланиши учун ҳозирча жиддий хавф мавжуд эмас.
Изоҳлар мавжуд емас