Ўзбекистон, Тошкент - Batafsil.uz. Ўзбекистоннинг Жиззах вилояти Фориш туманида мамлакатда қурилаётган атом электр станцияси учун ускуналар ишлаб чиқаришга ихтисослашган махсус саноат зонаси ташкил этилади. Унда ишлаб чиқаришни маҳаллийлаштириш учун инвесторларга солиқ ва божхона имтиёзлари берилади.
Бу ҳақда президент Шавкат Мирзиёевнинг ёқилғи-энергетика соҳасидаги инвесторлар билан очиқ мулоқоти давомида маълум қилинди. Давлат раҳбари матбуот котиби Шерзод Асадовнинг билдиришича, янги саноат зонаси маҳаллий ишлаб чиқаришни ривожлантиришга хизмат қилади.
Ҳозирда Ўзбекистонга юқори кучланишли ускуналар, энергия сақлаш тизимларини бошқариш модуллари ва шамол генераторлари учун бутловчи қисмлар катта ҳажмда импорт қилинмоқда. Ушбу маҳсулотларни мамлакатнинг ўзида ишлаб чиқариш мақсадида умумий қиймати 850 миллион долларлик 12 та истиқболли лойиҳа тайёрланган.
Президент бу борада Хитойнинг China Energy компанияси тажрибасини мисол қилиб келтирди. Компания қиймати қарийб 200 миллион доллар бўлган саккизта энергия сақлаш станциясини қуришда маҳаллий маҳсулотлардан деярли 40 фоиз фойдаланган.
Ўтган йили энергетика соҳасидаги барча инвестиция лойиҳаларида маҳаллий товар ва хизматлар қиймати 740 миллион долларга етган. Мирзиёев ушбу кўрсаткични 3–4 баравар ошириш мумкинлигини таъкидлаб, инвесторларни маҳаллий ишлаб чиқариш лойиҳаларида ҳамкорлик қилишга чақирган.
Саноат кооперацияси агентлиги ва маҳаллий уюшмалар талаб этиладиган маҳсулотларнинг сифати ҳамда ҳажмини аниқлаш, шунингдек, уларни ишлаб чиқарувчи корхоналар билан ҳамкорликни йўлга қўйишга кўмаклашади.
Изоҳлар мавжуд емас