Ўзбекистон, Тошкент - Batafsil.uz. Камбағалликни қисқартириш учун ҳудудларга ажратилаётган кредитлар самарадорлиги кескин фарқ қилмоқда. Айрим туманларда бир кишини камбағалликдан чиқариш учун ўртача 78 миллион сўм сарфланаётган бўлса, бошқа ҳудудларда бу кўрсаткич 250 миллион сўмга етмоқда.
Бу ҳақда Президент Шавкат Мирзиёев раислигида камбағалликни қисқартириш ва аҳоли даромадларини ошириш масалаларига бағишланган видеоселектор йиғилишида маълум қилинди.
Масалан, Шароф Рашидов ва Қарши туманларига бир хил — 2 триллион 300 миллиард сўмдан кредит ажратилган. Аммо Шароф Рашидов туманида 30 минг нафар аҳоли камбағалликдан чиқарилган ва бир киши ҳисобига ўртача 78 миллион сўм тўғри келган.
Қарши туманида эса 13 минг нафар эҳтиёжманднинг шароити яхшиланган. Бу ерда бир киши ҳисобига ўртача 176 миллион сўм сарфланган.
Қамаши ва Пискент туманларига ҳам 1 триллион 100 миллиард сўмдан кредит берилган. Қамашида 28 минг нафар аҳоли камбағалликдан чиқарилган бўлса, Пискентда бу кўрсаткич 4,5 минг нафарни ташкил этган.
Натижада Пискентда бир кишини камбағалликдан чиқариш учун ўртача 250 миллион сўм кредит тўғри келмоқда. Йиғилишда бунча маблағ айрим ҳудудларда саноатда юқори даромадли доимий иш ўрни яратишга етиши мумкинлиги таъкидланган.
Шу каби тафовутлар Гўзор, Нишон, Муборак, Янгиқўрғон, Тойлоқ, Бойсун, Олтинсой, Бандиҳон, Бешариқ, Фарғона туманлари ҳамда Нурафшон, Бекобод ва Янгийўл шаҳарларида ҳам кузатилаётгани қайд этилган.
Олдинроқ Олий Мажлис Қонунчилик палатасининг навбатдаги мажлисида Бош вазир ўринбосари — Иқтисодиёт ва молия вазири Жамшид Қўчқоров ҳукуматнинг 2026 йилнинг биринчи ярим йиллиги бўйича ҳисоботини тақдим
этганди. Бироқ тақдим этилган баландпарвоз кўрсаткичлар ва расмий маълумотлар парламентда қизғин муҳокама ҳамда кескин танқидларга сабаб бўлган эди. Унда Ўзбекистонда камбағаллик даражаси 4,5 фоизгача камайгани ҳақиқат эканлиги сўроқ остига олинганди.
Изоҳлар мавжуд емас