Ўзбекистон, Тошкент - Batafsil.uz. Ўзбекистон миллий терма жамоаси бош мураббийи Фабио Каннаваро жаҳон чемпионати доирасида Колумбияга қарши кечган учрашувдан кейин матбуот анжуманида ўз фикрларини билдирди. Италиялик мутахассис ўйин қизиқарли кечганини таъкидлаб, иккинчи бўлимда жамоаси вазиятни ўзгартиришга муваффақ бўлганини қайд этди.
Унинг сўзларига кўра, иккинчи таймда Ўзбекистон терма жамоаси ўйинни ўз назоратига олишга ҳаракат қилди, чап қанот орқали хавфли ҳужумлар ташкил этди ва бир қатор яхши имкониятлар яратди. Каннаваро терма жамоанинг асосий вазифаси Ўзбекистонни жаҳон саҳнасида муносиб тарзда намоён этиш бўлганини айтди.
"Мен ҳар доим футболчиларга бутун ўйин давомида фаол ҳаракат қилиш кераклигини таъкидлайман. Колумбия каби кучли жамоага қарши тўпсиз ҳолатда катта ҳажмда ишлаш осон эмас. Умуман олганда, иккинчи бўлимда яхши ўйнадик, аммо афсуски, яна гол ўтказиб юбордик", деди мураббий.
Унинг таъкидлашича, тўла мухлислар билан тўлган стадиондаги бу учрашув Ўзбекистон футболи тарихида муҳим ўрин тутади.
"Бу ўйин хотирамизда қолади, чунки биз жаҳон чемпионатида иштирок этмоқдамиз. Бугунги баҳс биз учун катта тажриба бўлди. Албатта, хатолар бўлди ва биз улар устида ишлаймиз", деди Каннаваро.
Мураббий, шунингдек, футболчиларининг ҳаракатларини юқори баҳолаб, Колумбия мухлислари яратган босимли муҳитда ўйнаш жуда қийин бўлганини қайд этди.
"Мен футболчиларим билан фахрланаман. Улар яхши ўйин намойиш этди. Бугунги учрашув жуда оғир кечди. Бундай стадионда ва шундай муҳитда ўйнаш осон эмас. Аммо айнан шундай муҳит жамоага қўшимча руҳ ва рағбат ҳам бериши мумкин", деди у.
Эслатиб ўтамиз, жаҳон чемпионатидаги дебют учрашувида Ўзбекистон терма жамоаси Колумбияга 1:3 ҳисобида мағлуб бўлди. Ўзбекистоннинг тарихий илк голига Аббосбек Файзуллаев муаллифлик қилди.
Изоҳлар мавжуд емас