Ўзбекистон, Тошкент - Batafsil.uz. Ўзбекистонда юк автомобиллари паркини янгилаш ва замонавийлаштириш мақсадида тадбиркорлар учун янги имтиёзлар жорий этилди. Бу Президентнинг "Автомобиль транспортида юк ташувларини амалга оширувчи тадбиркорлик субъектлари фаолиятини қўллаб-қувватлашга қаратилган қўшимча чора-тадбирлар тўғрисида"ги қарорида белгиланган.
Қарорга мувофиқ, 2027 йил 31 декабрга қадар ишлаб чиқарилганига беш йилдан ошмаган айрим турдаги юк транспорт воситаларини (самосваллар бундан мустасно) Ўзбекистонга импорт қилишда божхона божи ва утилизация йиғими бўйича нол ставка қўлланилади.
Имтиёз "Евро-5" ва ундан юқори экологик стандартларга жавоб берадиган юк автомобиллари ҳамда умумий оғирлиги 15 тоннадан ортиқ ёки юкхонасининг ички ҳажми камида 76 куб метр бўлган ярим тиркамаларга татбиқ этилади.
Шу билан бирга, имтиёзли шартларда олиб кирилган транспорт воситалари божхона расмийлаштирувидан ўтган кундан бошлаб уч йил давомида экспорт қилинса ёки қайта жиҳозлаш натижасида уларнинг ташқи иқтисодий фаолият товар номенклатураси (ТИФ ТН) коди ўзгарса, берилган имтиёзлар бекор қилинади. Бунда қонунчиликда белгиланган тартибда тегишли божхона тўловлари ундирилади. Мазкур талаб ёқилғи турини ўзгартириш билан боғлиқ қайта жиҳозлаш ҳолатларига нисбатан татбиқ этилмайди.
Президент қарори билан, шунингдек, Европа стандартларига жавоб берадиган мазкур юк автотранспорт воситаларини импорт қилишда уларни мажбурий сертификатлашдан вақтинча озод қилиш бўйича алоҳида ҳукумат қарори қабул қилиниши ҳам назарда тутилган.
Ҳужжатдан кўзланган асосий мақсад республикада юк ташиш соҳасида фойдаланилаётган транспорт паркларини янгилаш, экологик тоза ва замонавий техника улушини ошириш ҳамда тадбиркорларнинг харажатларини қисқартиришдан иборат.
Изоҳлар мавжуд емас