Ўзбекистон, Тошкент - Batafsil.uz. Қатар, Миср, Покистон ва бошқа минтақавий воситачилар АҚШ ҳамда Эронга ҳарбий ҳаракатларни вақтинча тўхтатиб, музокараларни қайта тиклашга қаратилган 10 кунлик ўт очишни тўхтатиш режасини таклиф қилган.
Келтирилган маълумотларга кўра, Дональд Трамп маъмурияти ушбу таклифни атрофлича ўрганиб чиқаётган ҳамда Исроилни дипломатик музокаралар имкониятини йўққа чиқариши мумкин бўлган кескин қадамлардан тийилишга чақирган. Шунга қарамай, Вашингтон музокаралар натижасиз якунланиши эҳтимолидан келиб чиқиб, Яқин Шарққа қўшимча ҳарбий кучлар юборишни давом эттирган.
Шу билан бирга, АҚШ Марказий қўмондонлигининг маълум қилишича, Америка кучларининг Эронга қарши сўнгги зарбалари тахминан беш соат давом этиб, кетма-кет ўнинчи тун амалга оширилган ҳамда улардан кўзланган асосий мақсад Эроннинг Ҳўрмуз бўғозидаги тижорат кемаларига ҳужум қилиш имкониятларини заифлаштиришдан иборат бўлган.
Ўз навбатида, Эрон ҳам Американинг Кувайтдаги Ал-Адири лагери, Али Ал-Салом авиабазаси ҳамда Иорданиядаги АҚШ ҳарбий объектларига қақшатқич зарбалар берган. Оқибатда дам олиш кунлари ҳалок бўлган америкалик ҳарбийлар сони 17 нафарга етган бўлса, Пентагон манбаларига кўра, тўқнашувлар бошланганидан буён қарийб 430 нафар АҚШ ҳарбий хизматчиси жароҳат олган.
Таъкидланишича, АҚШ Президенти Дональд Трамп америкалик ҳарбийлар ҳалок бўлганидан сўнг Эрондан шафқатсиз қасос олишга ваъда берган ҳамда нишонга олинаётган объектлар рўйхатини энергетика иншоотлари ва кўприклар ҳисобига кенгайтириш мумкинлигини уқтирган. Хусусан, Исроил армияси ҳам юқори жанговар шайлик ҳолатига келтирилган бўлиб, зиддиятнинг кенг кўламли ҳарбий кампанияга айланиб кетиш эҳтимолига ҳар тарафлама тайёргарлик кўрмоқда.
Олдинроқ Эрон вазиятни дипломатик йўл билан ҳал қилиш ва АҚШ билан ҳарбий қарама-қаршиликни тугатиш учун аввал жанговар майдонда мустаҳкам ва стратегик устунликка эришишни зарур деб ҳисобланишини маьлум қилган эди.
Изоҳлар мавжуд емас