Ўзбекистон, Тошкент - Batafsil.uz. Инвестициялар, саноат ва савдо вазирлиги 9 турдаги маҳсулот импорти учун божхона божининг ноль ставкасини узайтирмасликни таклиф қилди. Бироқ президент ҳузуридаги Тадбиркорликни қўллаб-қувватлаш бўйича Жамоатчилик кенгаши аъзолари бу қарор етарлича иқтисодий таҳлил билан асосланмаганини билдириб, лойиҳани қайта ишлаш учун вазирликка қайтаришни таклиф қилди.
Вазирлик тайёрлаган президент қарори лойиҳасига кўра, ҳозирда 56 турдаги асосий озиқ-овқат ва истеъмол маҳсулотлари импорти учун божхона божи бекор қилинган.
Ушбу имтиёзлар 2027 йил 1 январга қадар амал қилади. Лойиҳада 45 турдаги маҳсулот учун имтиёзларни тўлиқ, яна иккита товар позицияси бўйича эса қисман 2028 йил бошигача узайтириш назарда тутилган.
Бироқ қуюлтирилган сут ва қаймоқ, йогурт, пишлоқ ва творог, олма, нок ва беҳи, шакарли қандолат маҳсулотлари, шоколад, макарон, минерал ва газланган сувлар ҳамда алкоголли ичимликлар учун ноль ставкани узайтирмаслик таклиф қилинган.
Вазирлик вакили маҳаллий ишлаб чиқариш ҳажми ва ички бозор талабини қондириш имкониятлари таҳлил қилинганини билдирган.
Масалан, 2026 йилнинг январь–август ойларида қуюлтирилган сут ва қаймоқ ишлаб чиқарувчи 84 та корхона 82 минг тонна маҳсулот тайёрлаган, импорт ҳажми эса 15 минг тоннани ташкил этган.
Йогурт ишлаб чиқарувчи 77 та корхона шу даврда 50,2 минг тонна маҳсулот ишлаб чиқарган, импорт 9,8 минг тоннага етган.
Бироқ иқтисодчи Отабек Бакиров таклифга эътироз билдириб, имтиёзларни бекор қилиш етарлича иқтисодий ва молиявий асосланмаганини айтган. Унинг фикрича, ноль ставкали божхона имтиёзлари ҳар йили узайтирилиши ўрнига доимий белгиланиши керак. Бакиров айрим маҳсулотлар бўйича имтиёзларни камида уч йилга узайтиришни таклиф қилган.
Савдо ва хизмат кўрсатиш ассоциацияси раиси, Korzinka супермаркетлар тармоғи асосчиси Зафар Ҳошимов ҳам божхона божларининг оширилиши нафақат импорт, балки маҳаллий маҳсулотлар нархига ҳам таъсир қилишини таъкидлаган. Унинг айтишича, импорт маҳсулотлари нархи 20 фоизга ошса, бозорда рақобат камайиши сабабли маҳаллий маҳсулотлар нархи ҳам шунга яқин миқдорда кўтарилиши мумкин.
Савдо-саноат палатаси вакиллари эса имтиёзларни бекор қилишдан олдин маҳаллий ишлаб чиқариш, импорт, истеъмол ҳажми ва нархлар динамикасини қамраб олган батафсил таҳлил ўтказиш зарурлигини билдирган.
Муҳокама якунида лойиҳани қўшимча таҳлил ва тадбиркорлар билан маслаҳатлашувлар ўтказиш учун Инвестициялар, саноат ва савдо вазирлигига қайтариш таклиф қилинган.
Эслатиб ўтамиз, аввалроқ шакар импортини квоталаш ҳақидаги хабарлардан кейин импорт нархи ҳам қимматлашганди.
янги раисни танлаш учун очиқ танлов эълон қилинган.
Изоҳлар мавжуд емас