Ўзбекистон, Тошкент - Batafsil.uz. Apex Moliya компанияси исломий банкчилик тамойиллари асосида фаолият юритувчи микромолия банкига айланишни режалаштирмоқда. Марказий банкнинг рухсати олинса, у Ўзбекистондаги илк исломий микромолия банки бўлади.
Компания маълумотига кўра, қарор 14 июль куни бўлиб ўтган акциядорларнинг навбатдан ташқари умумий йиғилишида бир овоздан маъқулланган. Йиғилишда бўлажак банкнинг устави, бизнес-режаси ва ташкилий тузилмаси тасдиқланган, шунингдек, кузатув кенгаши, беш нафардан иборат бошқарув ва Исломий молия кенгаши шакллантирилган.
Исломий молия кенгашига Қирғизистондаги Alhamd Eurasia Sharia Advisory Services компанияси директори Акжигит Кокойев раис этиб тайинланган. Кенгаш таркибига Ўзбекистон мусулмонлари идорасининг икки нафар мутахассиси ҳам киритилган.
Энди компания Марказий банкдан дастлабки рухсат олиши лозим. Рухсат берилган тақдирда, қўшимча акциялар чиқариш орқали устав капиталини 50 миллиард сўмга етказиш режалаштирилган.
Ҳозирда Apex Moliya Ўзбекистондаги исломий микромолиялаштириш бозорининг энг йирик иштирокчиси ҳисобланади. Компания 2026 йилнинг биринчи чорагида 8,4 миллиард сўмлик хизмат кўрсатган бўлиб, бу мамлакатдаги жами 11,2 миллиард сўмлик исломий молиялаштириш бозорининг қарийб 75 фоизига тўғри келади.
Олдинроқ Адлия вазирлиги Банк фаолиятига рухсат бериш тартиби ва шартлари тўғрисидаги низомга киритилган ўзгартиш ва қўшимчаларни давлат рўйхатидан ўтказганди. Янги тартибга кўра, Ўзбекистонда исломий банклар ташкил этиш ва амалдаги банкларда "исломий дарча"лар очишнинг ҳуқуқий асослари белгиланган эди.
Изоҳлар мавжуд емас