Ўзбекистон, Тошкент - Batafsil.uz. Ўзбекистонда чекка ҳудудларда янги хусусий клиникалар очиш учун 200 миллиард сўм имтиёзли кредит ресурслари ажратилиши режалаштирилмоқда. Ҳар бир лойиҳа учун базавий ставканинг 50 фоизини компенсация қилган ҳолда 10 йил муддатга 10 миллиард сўмгача маблағ олиш мумкин бўлади.
Бу ҳақда мамлакат президенти Шавкат Мирзиёевга хусусий тиббиётни ривожлантириш бўйича тақдимот якунида маълум бўлди. Шунингдек, хорижий мутахассислар учун ижтимоий солиқни 1 фоиз миқдорида белгилаш таклиф этилди. Тиббий асбоб-ускуналар ва бутловчи қисмларни божхона тўловларидан озод қилиш режалаштирилган.
Инвестицияларни жалб қилиш учун Тиббиёт ва фармацевтика тармоғини ривожлантириш агентлиги ташкил этилади. У "ягона дарча" тамойили асосида ишлайди: инвесторларга маслаҳат беради ва давлат-хусусий шериклик лойиҳаларига ёрдам беради. Агентлик ҳузурида Health Invest акциядорлик компанияси ташкил этилади.
Хорижий экспертлар билан биргаликда давлат тиббиёт муассасаларини корпоратив бошқарув асосида трансформация қилиш стратегияси ишлаб чиқилади. Клиникаларни лойиҳалаш ва қуриш учун шаҳарсозлик ва санитария меъёрлари халқаро талабларга мувофиқлаштирилади.
Аввалроқ республикада хусусий клиникаларга аъзолар трансплантациясини ўтказишга рухсат берилиши хабар қилинганди. Шунингдек, нодавлат тиббиёт ташкилотлари амалдаги лицензия доирасида барча йўналишлар бўйича бюджет маблағлари ҳисобидан хизматлар кўрсатиши мумкин бўлади.
Изоҳлар мавжуд емас