Ўзбекистон, Тошкент - Batafsil.uz. Сирдарё вилоятининг Ширин шаҳрида юз берган оилавий низо қотиллик билан якунланиб, икки инсоннинг ҳаётига зомин бўлди. Рашк ва ўзаро келишмовчилик ортидан содир бўлган ҳужум оқибатида она ва унинг вояга етмаган фарзанди воқеа жойида вафот этди, яна бир кичик ёшли қизча эса оғир аҳволда шифохонага ётқизилди.
Бу ҳақида Бош прокуратура матбуот котиби Хаёт Шамсутдинов Batafsil.uz мухбирига хабар берди.
Дастлабки маълумотларга кўра, 2026 йил 29 апрель куни соат тахминан 17:00 ларда Ширин шаҳридаги "Фарҳод" маҳалласи, Навоий кўчасида жойлашган хонадонда икки аёл — эрнинг қонуний турмуш ўртоғи ва иккинчи хотини ўртасида кескин жанжал келиб чиққан. Айтилишича, ушбу можаро узоқ вақт давом этган оилавий келишмовчиликлар ва рашк туфайли янада авж олган.
Жанжал давомида гумонланувчи аёл ошхона пичоғини олиб, қарши томонга ҳужум қилган. У қонуний турмуш ўртоққа ҳамда унинг икки нафар вояга етмаган фарзандига қасддан тан жароҳати етказган. Ҳужум шиддатли кечгани, жабрланувчиларнинг ўзини ҳимоя қилиш имконияти чеклангани таъкидланмоқда.
Оқибатда аёл ва унинг 5 ёшли қизи воқеа жойида ҳаётдан кўз юмган. Яна бир 3 ёшли қизча оғир тан жароҳатлари билан зудлик билан шифохонага олиб борилган. Ҳозирда у жонлантириш бўлимида шифокорлар назорати остида даволанмоқда ва унинг аҳволи оғир деб баҳоланмоқда.
Ҳуқуқни муҳофаза қилувчи органлар мазкур ҳолат юзасидан жиноят иши қўзғатган. Гумонланувчи аёл ушланиб, терговга жалб қилинган. Ҳозирда иш бўйича барча ҳолатлар аниқланмоқда, воқеанинг келиб чиқиш сабаблари ва иштирокчиларнинг ҳаракатларига ҳуқуқий баҳо бериш юзасидан тергов ҳаракатлари олиб борилмоқда.
Олдинроқ Жарқўрғон туманида оилавий низо ҳам бахтсиз ҳодиса билан якунлангани ҳақида хабар берган эдик. Низо сабаб аёл турмуш ўртоғининг юрак соҳасига пичоқ уриб, унинг ўлимига сабабчи бўлганди.
Изоҳлар мавжуд емас