Ўзбекистон, Тошкент - Batafsil.uz. BBC томонидан АҚШ Давлат департаменти маълумотлари асосида эълон қилинган расмий статистикага кўра, Ўзбекистон фуқаролари учун АҚШнинг "B" туридаги (сайёҳлик ва бизнес) визаларини рад этиш кўрсаткичи 50 фоиздан юқори экани аниқланган. Мамлакатимиз дунё бўйича АҚШ визасини олиш энг қийин бўлган ва рад жавоблари 40 фоиздан ошадиган 11 та давлат қаторидан жой олган.
Инфографикада келтирилган 2024 йил октябридан 2025 йил сентябригача бўлган даврий ҳисобот таҳлиллари шуни кўрсатадики, ўзбекистонлик талабгорларнинг ярмидан кўпи (тахминан 52-53 фоизи) элчихона томонидан рад жавобини олмоқда. Бу кўрсаткич АҚШ визаси учун жаҳон бўйича қайд этилган умумий ўртача рад этиш даражасидан (34 фоиз) сезиларли даражада юқоридир. Мазкур ҳолат АҚШда бўлиб ўтадиган футбол бўйича жаҳон чемпионатига боришни режалаштирган ўзбекистонлик мухлислар учун ҳам энг катта тўсиққа айланмоқда.
Дунё миқёсида виза бериш энг кўп рад этиладиган давлатлар рейтингида Сенегал қарийб 74 фоизлик кўрсаткич билан биринчи ўринда турибди. Кейинги ўринларни Гана (64 фоиз), Конго ДР (63 фоиз), Эрон (62 фоиз) ва Иордания (56 фоиз) эгаллаган. Ўзбекистон ушбу рўйхатда Кабо-Вердедан кейин, Жазоир (51 фоиз), Гаити (50 фоиз), Миср (47 фоиз) ва Эквадор (42 фоиз) каби давлатлардан эса юқорироқ кўрсаткич билан жойлашган.
АҚШ расмий идораларининг билдиришича, бундай юқори рад этиш кўрсаткичлари мамлакатга кириб келаётган хорижликларнинг виза муддати тугаганидан кейин қолиб кетиш хавфи ҳамда иммиграция тизимини назорат қилишнинг қатъийлаштирилгани билан изоҳланади. Бу эса Ўзбекистон каби давлатлардан кетадиган оддий сайёҳлар ва спорт мухлисларининг чипта сотиб олишдан аввал виза олиш имкониятларини жиддий таваккалчилик остида қолдирмоқда.
Аввалроқ Президент Дональд Трамп АҚШ элчихоналари 2026 йил Жаҳон чемпионати билетлари бўлган сайёҳларга виза суҳбатида устуворлик беришини маълум қилганди.
Изоҳлар мавжуд емас