Ўзбекистон, Тошкент - Batafsil.uz. Олий таълимга киришда ўзлари танлаган бешта йўналишнинг бирортасига ҳам тавсия этилмаган, аммо юқори балл тўплаган абитуриентларга қўшимча равишда 6-йўналишни танлаш имконияти берилади. Бу тартибни келаси ҳафтадан йўлга қўйиш режалаштирилмоқда.
Олий таълим, фан ва инновациялар вазирлиги маълум қилишича, 6-йўналишни танлаш имконияти фақат абитуриентнинг фанлар мажмуасига мос ва бўш ўрин қолган таълим йўналишлари бўйича тақдим этилади.
Шунингдек, вазирлик вакили маълум қилишича, жорий қабулда 56,7 баллдан кам натижа тўплаган абитуриентлар сони 233 935 нафарни ташкил этган. Бу барча абитуриентларнинг 37,54 фоизига тенг.
Қайд этилишича, ушбу кўрсаткич йилдан йилга камайиб бормоқда. Хусусан, ўтган йили 56,7 баллдан кам натижа қайд этган абитуриентлар улуши 41 фоиз, ундан олдинги йил 43 фоиз, яна бир йил аввал эса 46 фоизни ташкил қилган.
Вазирлик вакили бу тенденция абитуриентларнинг ўртача натижалари ва кириш баллари ошиб бораётганини кўрсатаётганини таъкидлаган.
Эслатиб ўтамиз, Ўзбекистонда 2026/2027 ўқув йили учун ОТМларга қабул қилиш кампанияси қоидалари тасдиқланиб, давлат буюртмаси доирасида бакалавриатнинг кундузги таълим шаклига бюджет ҳисобидан 36 мингдан ортиқ абитуриент қабул қилиниши, магистратурани ҳисобга олган ҳолда жами 46 мингдан ортиқ талабанинг ўқиши учун тўлов давлат томонидан амалга оширилиши хабар қилинганди.
Изоҳлар мавжуд емас