Ўзбекистон, Тошкент - Batafsil.uz. 2018 йилдан бери Новосибирскдаги мурувват уйларидан бирида ҳужжатсиз яшаб келаётган Ўзбекистон фуқаролари ниҳоят янги паспорт олди. Уларнинг шахсини Ўзбекистон Бош консулхонаси аралашувидан сўнг аниқлаш имкони бўлди.
Идоранинг маълум қилишича, эркаклар бахтсиз ҳодиса туфайли ногирон бўлиб қолганидан сўнг мурувват уйига жойлаштирилган.
Дипломатик миссия маълумотларига кўра, ватандошлар 2026 йил март ойида муассасага ташрифи чоғида бош консул томонидан тасодифан топилган. Бу вақт мобайнида улар ҳужжатсиз яшаган, шахслари эса амалда аниқланмаган. Шу билан бирга, маҳаллий ижтимоий хизматлар ушбу масала бўйича Ўзбекистон Бош консулхонасига бирор марта ҳам мурожаат қилмаган.
Учрашув ва шахсий суҳбатдан сўнг зарур ҳужжатларни расмийлаштириш бўйича тезкор ишлар бошланди. Эркакларнинг шахси ва фуқаролиги тасдиқланди, сўнгра уларга янги паспортлар тайёрланиб, топширилди.
Бош консулхона ушбу шахсларнинг кейинги тақдири алоҳида назоратда эканлигини таъкидлади.
Эслатиб ўтамизки, аввалроқ Ўзбекистоннинг Владивостокдаги Бош консулхонаси Миграция агентлиги билан ҳамкорликда ночор аҳволга тушиб қолган бир оиланинг ватанига қайтишига кўмаклашганди. Оила бошлиғи жиддий жароҳат олган, эр-хотин тирикчилик учун маблағсиз қолган ва уйга йўл ҳақини мустақил равишда тўлай олмаган.
Изоҳлар мавжуд емас