Ўзбекистон, Тошкент - Batafsil.uz. Эндиликда коррупцияга оид жиноятларни содир этганликда айбдор деб топилган шахсларнинг махсус электрон реестри юритилади.
Мазкур реестрга киритилган шахсларга нисбатан бир қатор чекловлар қўлланилади. Хусусан, улар давлат хизматига қабул қилинмайди ва давлат мукофотлари билан тақдирланмайди.
Шунингдек, бундай шахсларнинг сайланадиган ёки алоҳида тартибда тайинланадиган лавозимларга номзоди кўрсатилишига йўл қўйилмайди. Улар давлат органлари ҳузуридаги жамоатчилик кенгашлари ҳамда идоралараро коллегиал органлар таркибига ҳам киритилмайди.
Реестрга киритилган шахслар таъсис этган ёки устав капиталидаги улушининг 50 фоизидан ортиқ қисмига эгалик қиладиган тадбиркорлик субъектлари давлат харидлари ҳамда давлат-хусусий шериклик лойиҳаларида иштирокчи ёки ижрочи сифатида қатнашиш ҳуқуқидан маҳрум этилади.
Бундан ташқари, улар давлат улуши 50 фоиздан юқори бўлган ташкилотларда ва давлат таълим муассасаларида раҳбарлик лавозимларида фаолият юрита олмайди.
Маълум қилинишича, коррупцияга оид жиноятлар учун судланган шахсларнинг электрон реестри Коррупцияга қарши курашиш агентлиги томонидан Ички ишлар вазирлиги билан ҳамкорликда юритилади.
Изоҳлар мавжуд емас