Ўзбекистон, Тошкент - Batafsil.uz. Тошкент ҳокимияти христианларнинг марҳумларни хотирлаш куни - Ота-оналар куни муносабати билан махсус вақтинчалик автобус йўналишларини ташкил этади.
Транспорт ва йўл-транспорт инфратузилмасини ривожлантириш бош бошқармаси маълумотларига кўра, эртага, 21 апрель куни иккита вақтинчалик бир кунлик қатнов ташкил этилади.
К-1 йўналиши "Буюк Ипак Йўли" метро бекати ва 3-сонли қабристонни (Ўртасарой) боғлайди, К-2 йўналиши эса Қўйлиқ деҳқон бозоридан ўша қабристонгача давом этади.
Ҳар бир йўналишда бешта катта сиғимли автобус: MAN, Yutong, GAZ, шунингдек, электробуслар ҳаракатланади.
Йўлкира тўлови фақат нақд пулсиз шаклда амалга оширилади ва 1,7 минг сўмни ташкил этади. Автобуслар соат 06:00 дан 20:00 гача ҳаракатланади.
Бундан ташқари, шу куни шаҳарнинг бошқа қабристонларига борадиган мавжуд йўналишлардаги ҳаракат ва оралиқлар устидан назорат кучайтирилади. Хусусан, Боткин кўчаси бўйлаб 1-сонли қабристонга 1, 14, 16, 21, 30, 80 ва 96-сонли маршрутлар, 2-сонли қабристонга (Дўмбиробод) эса 17т ва 98-сонли маршрутлар боради.
Изоҳлар мавжуд емас