Ўзбекистон, Тошкент - Batafsil.uz. 2026 йилнинг биринчи ярим йиллигида Ўзбекистон фуқароларининг Россияга ишлаш мақсадида киришлари сони ўтган йилнинг шу даврига нисбатан 13,2 фоизга қисқарди. Бу ҳақда Россия чегара хизмати статистикасига таяниб, "Ведомости" нашри хабар қилди.
Маълумотларга кўра, жорий йилнинг январь-июнь ойларида Ўзбекистон, Тожикистон ва Қирғизистон фуқаролари Россияга ишлаш мақсадида жами қарийб 1,9 миллион марта кирган. Бу 2025 йилнинг мос даврига нисбатан 15 фоизга камдир.
Энг кўп ишчи киришлари Ўзбекистон фуқаролари ҳиссасига тўғри келиб, уларнинг сони 1,1 миллиондан ошган. Шу билан бирга, Тожикистон фуқароларининг ишлаш мақсадидаги киришлари 494,5 мингтани ташкил этиб, 17,9 фоизга, Қирғизистон фуқаролариники эса 289,1 мингтага тушиб, 16,7 фоизга камайган.
Мутахассислар ушбу пасайишни Россияда миграция сиёсати кучайтирилгани, патентлар қимматлашгани, тиббий кўрик, турар жой ижараси ва авиачипта харажатлари ошгани билан изоҳламоқда. Шунингдек, Марказий Осиё давлатларида янги иш ўринлари кўпайиши ҳамда меҳнат муҳожирларининг Жанубий Корея, Хитой, Яқин Шарқ мамлакатлари ва Европа Иттифоқи меҳнат бозорларига қизиқиши ортиб бораётгани қайд этилган.
Бундан ташқари, ҳуқуқшунослар Россияда бўлиш муддатини бузган хорижликлар назоратдаги шахслар реестрига тез-тез киритилаётганини, шу сабабли улар мамлакатни тарк этишга мажбур бўлаётганини таъкидламоқда. Шу билан бирга, Россиядаги иш берувчилар визали давлатлардан ишчиларни фаолроқ жалб қилаётгани ҳам миграция статистикасига таъсир кўрсатган омиллардан бири сифатида баҳоланмоқда.
Маълумот учун, Россия пойтахти иқтисодиётига мигрантларнинг умумий ҳиссаси тахминан 23-25 фоизни ташкил қилади. Экспертларнинг фикрича, мигрантлар Москвага харажатлардан кўра кўпроқ даромад келтиради. Бу уларнинг меҳнатидан фойдаланишни нафақат иқтисодий, балки бюджет жиҳатидан ҳам фойдали қилади.
Изоҳлар мавжуд емас