Ўзбекистон, Тошкент - Batafsil.uz. Президент Администрацияси раҳбари Саида Мирзиёева 24-июн куни Андижон вилоятига ташриф буюриб, ҳудуддаги ижтимоий объектлар ҳолати ва сув таъминоти тизимини модернизация қилиш масалаларини ўрганди. У ўзгаришлар ўн йиллаб чўзилмаслиги, аксинча, натижалар тез фурсатда амалда кўриниши кераклигини таъкидлади.
Саида Мирзиёева ташриф давомида Олтинкўл туманидаги бир қатор эскирган объектларни кўздан кечирган. Хусусан, 1988 йилдан буён фойдаланиб келинаётган ва замонавий тиббиёт талабларига жавоб бермайдиган "Кўмакай" оилавий поликлиникаси, 1970 йилларда қурилган 9-сонли боғча ҳамда 1960 йилда барпо этилган, ўқувчилар сиғимига мос келмайдиган 36-сонли мактаб аҳволи билан танишди.
Объектларнинг эскирганлиги ва таъмирталаблиги инобатга олиниб, уларни қайтадан қуриш бўйича топшириқ берилди: "Гап тиббиёт ва таълим ҳақида кетар экан, шифокор ва ўқитувчининг иш жойи, яратилган шароит ҳамда фарзандини мактаб ёки боғчага кузатаётган ота-онанинг кўнгли тўқ бўлиши энг муҳим ва биринчи галдаги масаладир. Одамлар турмушини яхшилашга қаратилган ўзгаришлар ўн йиллаб чўзилмаслиги керак", — дея қайд этган Президент Администрацияси раҳбари.
Шунингдек, вилоят раҳбарияти ва туман ҳокимлари иштирокида ўтказилган ишчи йиғилишда энг муҳим масалалардан бири — 1980 йилларда қурилган магистраль сув тармоғини янгилаш муҳокама қилинган. Аҳоли хонадонлари, маҳаллалар ва ташкилотларнинг сув таъминотига бевосита дахлдор бўлган ушбу йирик иншоотни реконструкция қилиш жараёнини кечиктириб бўлмаслиги алоҳида таъкидланган.
Саида Мирзиёева муаммоларни ҳал этишда республика, вилоят ва туман даражасидаги ҳамжиҳатлик муҳимлигини қайд этиб, қарорларни тезкорлик билан қабул қилиш, уларнинг ижро муддатларини аниқ белгилаш бўйича масъулларга кўрсатмалар берган.
Изоҳлар мавжуд емас