Ўзбекистон, Тошкент - Batafsil.uz. Тошкент шаҳрида жамоат транспорти кутиш жойларини жисмоний фаолият ҳудуди билан уйғунлаштирган биринчи бекат ишга туширилди. Сергели туманидаги автомобиль бозори яқинида ўрнатилган ушбу ноодатий мажмуа йўловчиларга транспортни кутиш давомида спорт билан шуғулланиш имконини беради.
Тартибга солиш маркази ташаббуси билан амалга оширилган лойиҳа шаҳар инфратузилмасини фақат ҳаракатланиш эмас, балки аҳоли саломатлиги ва кундалик қулайлигига хизмат қилувчи муҳитга айлантиришни кўзда тутади. Мазкур бекат орқали айни дамда 12 та автобус йўналиши ўтади.
Лойиҳа муаллифларининг таъкидлашича, дунёнинг Сеул, Пекин, Сингапур ва Париж каби шаҳарларида синалган бу каби тажрибани Тошкентда ҳам босқичма-босқич жорий этиш режалаштирилган. Келгусида бундай объектлар йўловчилар оқими юқори ва етарли жойга эга бўлган бошқа ҳудудларда ҳам ўрнатилади.
Бунда асосий эътибор конструкцияларнинг мустаҳкамлиги, бехатарлиги ҳамда ускуналарнинг пиёдалар ва транспорт ҳаракатига халақит бермаслигига қаратилади. Аҳоли ушбу лойиҳани ривожлантириш бўйича ўз таклифларини Транспортни ташкил этиш марказининг @codd_tashkent_bot телеграм-боти орқали йўллаши мумкин.
Эслатиб ўтамиз, илгарироқ Тошкент шаҳрида жамоат транспорти ҳаракатини тезлаштириш ва тирбандликларни камайтириш мақсадида "А" тоифали алоҳида йўлаклар тизими янада такомиллаштирилиши хабар
қилинган эди. Хусусан, Magic City ҳудудидаги Фурқат кўчасидан Халқлар дўстлиги саройигача бўлган масофада аввал чизилган йўл чизиқлари эндиликда делиниаторлар — махсус жисмоний ажратувчи элементлар билан мустаҳкамланмоқда.
Изоҳлар мавжуд емас