Ўзбекистон, Тошкент - Batafsil.uz. UzPost акциядорлари Wb int export компаниясидан 100 миллиард сўм миқдорида қарз жалб қилиш таклифини маъқулламади. Овоз беришда қатнашган барча акциядорлар ушбу масала бўйича бетараф қолган.
Шу йиғилишда UzPost кузатув кенгашининг янги таркиби ҳам сайланган. Унга Wildberries & Russ тузилмалари вакилларидан беш киши киритилган.
Янги кузатув кенгаши таркибидан Wb int export бош директори Акмал Примқулов, РВБ инвестициялар ва назорат департаменти директори Евгений Митин, РВБ юридик департаменти директорининг ўринбосари Эмиль Хасянов, РВБ молиявий директори Павел Логунов ҳамда "ВБ Банки" ҳудудий ривожланишни бошқариш департаменти директори Александра Хмелева ўрин олди.
Кенгашга, шунингдек, рақамли технологиялар вазирининг биринчи ўринбосари Олег Пекось, Ҳисоб палатаси мутахассиси Шаҳзод Усаров, Иқтисодиёт ва молия вазирлиги бошқарма бошлиғи Муззафар Астонақулов ҳамда мустақил аъзо Роджер Крук киритилди.
Аввалги кузатув кенгаши аъзоларининг ваколатлари муддатидан олдин тугатилди. Бу қарорни овоз беришда қатнашган барча акциядорлар қўллаб-қувватлади.
Wb int export компаниясидан 100 миллиард сўм қарз олиш таклифи Марказий банкнинг қайта молиялаш ставкасидан фойдаланишни назарда тутган. Қарзни қайтариш жадвали, шунингдек, акциядорлар талаби билан компания акцияларини сотиб олиш ва кейинчалик уларни бекор қилиш тартиби ҳам қарор лойиҳасига киритилган.
Бироқ овоз беришда қатнашган акциядорларнинг барчаси ушбу таклиф бўйича бетараф қолган. Шу сабабли 100 миллиард сўмлик қарзни жалб қилиш ҳақида қарор қабул қилинмади.
Аввалроқ UzPost хусусийлаштирилиши мумкинлиги ҳақида хабарлар тарқалган эди. Иқтисодчи Отабек Бакиров миллий почта оператори "шимолдаги маркетплейслардан бири"га сотилиши мумкинлигини айтган, экспертлар эса гап Wildberries ҳақида кетаётганини тахмин қилган.
Ўшанда UzPost инвестор жалб қилиш масаласи кўриб чиқилаётганини тасдиқлаган. Коррупцияга қарши курашиш агентлиги эса хусусийлаштириш жараёнини шаффоф ўтказишга чақирган. Ҳукумат ҳам, Wildberries ҳам ушбу эҳтимолий битимга расмий изоҳ бермаган.
Изоҳлар мавжуд емас