Ўзбекистон, Тошкент - Batafsil.uz. Президент Шавкат Мирзиёев 27 июль куни Янги Тошкент шаҳрида амалга оширилаётган йирик бунёдкорлик лойиҳалари билан атрофлича танишди. Давлат раҳбари ташриф давомида дастлаб U-20 мусобақалари учун мўлжалланган 55 минг ўринли стадион, сўнг Миллий кутубхона ҳамда университетлар кампусларидаги қурилиш жараёнларини кўздан кечирди.
Стадион қурилиши 2025 йил ноябрь ойида бошланган бўлиб, ҳозирга қадар қурилиш ишларининг қарийб 65 фоизи бажарилган. У 2027 йил Ўзбекистонда бўлиб ўтадиган U-20 жаҳон чемпионатининг асосий аренаси бўлиши режалаштирилган.
Бундан ташқари, Президент Низомий номидаги Ўзбекистон миллий педагогика университети ҳамда "Янги Ўзбекистон" университетининг янги кампусларида олиб борилаётган якуний қурилиш ва пардозлаш ишларини кўздан кечирди.
Қолаверса, 30 минг квадрат метр майдонга эга тўрт қаватли Миллий кутубхонада қурилиш ишларининг 90 фоизи якунлангани таъкидланди. Унда китоб фонди, рақамли архивлар, ўқув заллари ва замонавий жамоат майдонлари жойлаштирилади. Миллий кутубхона ҳамда ҳар икки университет кампусини 2026 йилда фойдаланишга топшириш режалаштирилган.
Шунингдек, давлат раҳбарига Янги Тошкент шаҳрининг бош режаси, муҳандислик-коммуникация тармоқлари ва ижтимоий инфратузилмани ривожлантириш бўйича лойиҳалар тақдим этилди. Президент қурилиш ишларининг сифати, объектларни белгиланган муддатларда якунлаш ва уларни замонавий талаблар асосида жиҳозлаш юзасидан масъулларга топшириқлар берди.
Олдинроқ Президент Шавкат Мирзиёев 2025 йил декабрь ойида "Янги Тошкент" ҳудудидаги муҳим инфратузилма объектлари ва янги маъмурий биноларни кўздан кечирганди.
Изоҳлар мавжуд емас