Ўзбекистон, Тошкент - Batafsil.uz. Жорий йилнинг ўтган даврида Бош прокуратура ҳузуридаги Мажбурий ижро бюроси томонидан 54,8 триллион сўм маблағ ундирилди. Бу ўтган йилнинг мос даврига нисбатан 14,4 триллион сўмга кўп. Ундирилган маблағларнинг асосий қисми давлат, тадбиркорлик субъектлари ва фуқаролар манфаатларига йўналтирилган.
Бу ҳақда Мажбурий ижро бюроси Ахборот хизмати раҳбари Фаррух Тошпўлатов иштирокидаги брифингда маълум қилинди.
Қайд этилишича, ундирилган маблағларнинг 36,7 триллион сўми давлат фойдасига, 16,5 триллион сўми тадбиркорлик ва бошқа субъектлар фойдасига, 1,6 триллион сўмдан ортиғи эса фуқаролар манфаатлари учун йўналтирилган. Шунингдек, давлатнинг мажбурлов механизмларидан фойдаланмасдан 2,2 триллион сўмлик ижро ҳужжатлари бажарилиши таъминланган.
Ижтимоий йўналишдаги ижро ишлари доирасида "Дафтарлар" билан боғлиқ жамғармаларга 1,3 триллион сўм маблағ йўналтирилган. Бу ўтган йилнинг мос даврига нисбатан 222 миллиард сўмга кўп.
Шу даврда 3 триллион сўм алимент ундирилган. "Алимент тўловлари" жамғармаси ҳисобидан эса 565 нафар фуқарога 30,5 миллиард сўм тўлаб берилган. Манзилли ишлар натижасида 21 мингдан ортиқ фуқаро ишга жойлаштирилган, 11,2 мингдан зиёд оила яраштирилган.
Бундан ташқари, ноқонуний ишдан бўшатилган 508 нафар фуқаро ишга тикланган ва уларнинг фойдасига 21,6 миллиард сўм иш ҳақи ундириб берилган.
Брифингда Мажбурий ижро бюроси фаолиятини рақамлаштириш ишлари ҳам давом этаётгани таъкидланган. Ҳозирда 36 турдаги ижро ҳаракатининг 22 таси, шунингдек, қабул қилинган 68,7 миллионта қарор инсон омилисиз автоматик тарзда амалга оширилмоқда.
Қарздорларга мажбуриятлари ҳақида эслатиш мақсадида 79,3 миллионта SMS-хабарнома юборилган, "Авторобот" орқали эса 2,4 миллионта қўнғироқ амалга оширилган. Қарздорлик ҳақида ўз вақтида хабар бериш натижасида 1,2 миллионта ижро иши ихтиёрий муддатда якунланган. Шунингдек, 1,8 миллионта автотранспорт воситасига автоматик тарзда қидирув эълон қилинган.
Алимент ундирувлари билан боғлиқ масалалар бўйича Виртуал ва Халқ қабулхоналари орқали 49 611 та мурожаат келиб тушган. Уларнинг 32 598 таси ҳал этилган.
Манзилли ишлар натижасида алимент ундируви билан боғлиқ мурожаатлар сони 7 526 тага, қарз ва зарарни ундириш бўйича мурожаатлар эса 3 507 тага камайган.
Олдинроқ алиментдан қарзи бор қидирувдаги ота тунги клубдан топилгани ҳақида хабар берган эдик.
Изоҳлар мавжуд емас