Ўзбекистон, Тошкент – Batafsil.uz. Адлия вазирлиги маълумотларига ҳавола қилган ҳолда мухбиримиз хабар беришича, Ўзбекистонда 2021 йилнинг 1 апрелидан ҳайдовчилик гувоҳномасини олиш учун амалий ва назарий имтиҳонлар хусусий корхоналар томонидан ўтказилади.
Бу президентнинг "Давлат томонидан тартибга солинадиган соҳаларга хусусий секторни жалб этиш бўйича қўшимча чора-тадбирлар тўғрисида" ги қарори билан назарда тутилган ( № ПҚ-4913, 07.12.2020).
Ҳужжатга кўра, 2021 йилнинг 1 апрелидан бошлаб, автомобиль транспорт воситалари ва шаҳар электр транспорти ҳайдовчиларини тайёрлаш, қайта тайёрлаш ва малакасини ошириш учун нодавлат таълим хизматларини кўрсатиш бўйича лицензияга эга бўлган тадбиркорлик субъектларига автотранспорт воситалари (трамвай ва троллейбуслар бундан мустасно) барча тоифаларини бошқариш бўйича ҳайдовчилик гувоҳномасини олиш учун назарий ва амалий имтиҳонларни ўтказиш ҳуқуқи берилади.
Бунда:
-
ҳайдовчилик гувоҳномасини олиш учун назарий ва амалий имтиҳонларни ўтказиш ва баҳолаш инсон омили иштирокисиз, тўлиқ автоматлаштирилган режимда амалга оширилади;
-
имтиҳонлар давлат йўл ҳаракати хавфсизлиги хизмати вакилининг бевосита ёки онлайн назорати остида ўтказилади;
-
ҳайдовчилик гувоҳномасини олиш учун назарий ва амалий имтиҳонларни ўтказиш бўйича хизматлар учун тўловлар миқдори тадбиркорлик субъектлари томонидан мустақил тарзда белгиланади ва олинган маблағлар тўлиқлигича уларнинг ихтиёрида қолади;
-
назарий ва амалий имтиҳонлардан муваффақиятли ўтган шахсларга ҳайдовчилик гувоҳномасини олиш учун асос бўладиган махсус ҳимояланган сертификатлар берилади;
-
махсус ҳимояланган гувоҳномаларнинг барча зарурий реквизитлари тадбиркорлик субъектлари томонидан давлат хизматлари марказлари ва ички ишлар идораларига автоматлаштирилган режимда тақдим етилади.
Изоҳлар мавжуд емас