Ўзбекистон, Тошкент - Batafsil.uz. Ўзбекистонда давлат харидларининг электрон тизимларида тадбиркорлар жойлаштирадиган оферталарнинг амал қилиш муддати 15 кундан 60 кунгача узайтирилди. Шунингдек, товарларни етказиб бериш муддати камида беш кун этиб белгиланди. Ўзгаришлар Президентнинг ПФ–259-сон фармонига мувофиқ жорий этилди.
Саноат кооперацияси ва давлат харидлари агентлиги маълум қилишича, янги тартиб "Электрон дўкон", "Миллий дўкон" ва экоплатформада жойлаштириладиган оферталарга тааллуқли.
Оферталарнинг амал қилиш муддати тугашидан беш кун олдин электрон тизим тадбиркорларга автоматик огоҳлантириш юборади. Бу орқали улар муддат якунланишини олдиндан билиб, зарур ҳаракатларни амалга ошириши мумкин.
Агентликка кўра, ўзгаришлар тадбиркорларнинг оферталарни қайта-қайта фаоллаштириш билан боғлиқ оворагарчилигини камайтириш, вақтини тежаш ва давлат харидларида иштирок этиш жараёнини қулайлаштиришга қаратилган.
Бундан олдин Олий Мажлис палаталари ва "Юксалиш" ҳаракати ҳамкорлигида тадбиркорлар билан очиқ мулоқот ўтказилганда 50 дан ортиқ тадбиркор кредит олиш, электр ва газ тармоқларига уланиш, ҚҚСни қайтариш ҳамда экспортдаги тўсиқлар каби муаммоларни кўтарганди.
Изоҳлар мавжуд емас