Ўзбекистон, Тошкент - Batafsil.uz. OpenAI компанияси ChatGPT фойдаланувчилари учун мулоқотлар махфийлигини оширувчи янги функция — чатларни блоклаш имкониятини ишга туширди. Эндиликда фойдаланувчилар ўз суҳбатларини тўрт хонали ПИН-код, шунингдек, қурилма томонидан қўллаб-қувватланадиган Face ID ёки Touch ID биометрик тизимлари орқали ҳимоялашлари мумкин.
Янги функция вақтинчалик чатлар (Temporary Chats)дан фарқли ўлароқ, суҳбатлар тарихини ўчириб юбормайди ва исталган вақтда уларга қайтиш имконини беради.
Блокга туширилган чатлар асосий суҳбатлар тарихи ва қидирув натижаларидан ажратилган ҳолда алоҳида "Блокга туширилган чатлар" бўлимида сақланади. Эътиборлиси, ушбу бўлим ўзининг алоҳида хотира тизимига эга бўлиб, бу ердаги янги маълумотлар оддий чатлар хотирасига сизиб чиқмайди.
Бироқ OpenAI ПИН-код тикланганда ушбу ҳимояланган сирли чатлар ва улардаги маълумотлар бутунлай ўчиб кетишидан огоҳлантирмоқда.
Шунингдек, компания чатларни блоклаш тўлиқ шифрлаш (end-to-end) тизимини яратмаслигини ҳамда модель таълими созламаларини ўзгартирмаслигини билдирган.
Ушбу функция гуруҳли, архивланган ва вақтинчалик чатлардан ташқари, ChatGPT сунъий интеллектининг деярли барча тариф режаларида (Free, Plus, Pro, Business ва ҳоказо) босқичма-босқич жорий этилмоқда.
Аввалроқ АҚШнинг саккизта штати Бош прокуратураси ўз жонига қасд қилиш йўлларини ўргатган сунъий интеллектни судга берганди.
Изоҳлар мавжуд емас